hawa bhi hai sans bhi rawan hai ajab si phir bhi ghuTan hai koi

havā bhī hai saañs bhī ravāñ hai ajab sī phir bhī ghuTan hai koī

rihā.ī pā ke bhī yuuñ lage hai musallat-e-jān-o-tan hai koī

nikāl letā hai jo shamīm aur zā.iqa har gul-o-samar se

kamāl kā sāhab-e-mahārat nigāh-dār-e-chaman hai koī

huā thā ik sāneha ki ham ho ga.e the mahrūm rāhbar se

hai sāneha ye digar ki aage jo le chalā rāhzan hai koī

masāfatoñ se na ho sake tai ajiib bāham ye fāsla hai

isī tanāsub se dūr-tar hai qarīb agar nisbatan hai koī

bigaḌ ke tasvīr jāniye ho ga.ī hai tajrīd kā namūna

ujaḌ gayā hai kuchh aisā chehre kā shahr kahiye ki ban hai koī

patā lagānā huā hai dushvār kaun hai ḳhalt-malt kis kā

hai zaat us kī vajūd merā hai jaañ kisī kī badan hai koī

ye kis jagah inhimāk se guftugū kā yuuñ silsila hai jaarī

jahāñ pe ham-zehn-o-ham-zabāñ hai na ham-dam-o-ham-suḳhan hai koī

kahīñ bhī duniyā meñ hoñ mujhe is ḳhayāl se taqviyat rahī hai

mudām ābād shaad rakhe ḳhudā ki merā vatan hai koī

sune haiñ 'shaukat' ḳhayāl kyā kyā ye log dekhe haiñ kaise kaise

kitāb hai baat meñ kisī kī na zaat meñ anjuman hai koī

hawa bhi hai sans bhi rawan hai ajab si phir bhi ghuTan hai koi

rihai pa ke bhi yun lage hai musallat-e-jaan-o-tan hai koi

nikal leta hai jo shamim aur zaiqa har gul-o-samar se

kamal ka sahab-e-mahaarat nigah-dar-e-chaman hai koi

hua tha ek saneha ki hum ho gae the mahrum rahbar se

hai saneha ye digar ki aage jo le chala rahzan hai koi

masafaton se na ho sake tai ajib baham ye fasla hai

isi tanasub se dur-tar hai qarib agar nisbatan hai koi

bigaD ke taswir jaaniye ho gai hai tajrid ka namuna

ujaD gaya hai kuchh aisa chehre ka shahr kahiye ki ban hai koi

pata lagana hua hai dushwar kaun hai KHalt-malt kis ka

hai zat us ki wajud mera hai jaan kisi ki badan hai koi

ye kis jagah inhimak se guftugu ka yun silsila hai jari

jahan pe ham-zehn-o-ham-zaban hai na ham-dam-o-ham-suKHan hai koi

kahin bhi duniya mein hon mujhe is KHayal se taqwiyat rahi hai

mudam aabaad shad rakhe KHuda ki mera watan hai koi

sune hain 'shaukat' KHayal kya kya ye log dekhe hain kaise kaise

kitab hai baat mein kisi ki na zat mein anjuman hai koi