hawa chaman ki bhala hum ko sazgar kahan

havā chaman kī bhalā ham ko sāzgār kahāñ

bahār naam ko hai asal meñ bahār kahāñ

jo tum nahīñ the to ik lutf-e-intizār to thā

tum aa ga.e ho to ab lutf-e-intizār kahāñ

chaman se duur bhī dekhī hai fasl-e-gul ham ne

magar vo silsila-e-naġhma-e-bahār kahāñ

numūd-e-sub.h huī aur ujaḌ ga.ī mahfil

mai-e-shabāna kahāñ ab vo mai-gusār kahāñ

chaman ye shahr-e-nigārāñ banā to hai lekin

mirī bahār ko chhoḌ aa.ī hai bahār kahāñ

huī haiñ un se uchaTtī sī kuchh mulāqāteñ

magar ye kaif ba-andāza-e-ḳhumār kahāñ

na siina chaak hai koī na ab garebāñ chaak

gayā na jaane vo sarmāya-e-bahār kahāñ

ba-faiz-e-azmat-e-syāñ milī hai ye tauqīr

vagarna dar-ḳhur-e-rahmat gunāhgār kahāñ

na vo sohbat-e-māzī na us kī yaad ai 'arsh'

jo kārvāñ hī nahīñ hai to phir ġhubār kahāñ

hawa chaman ki bhala hum ko sazgar kahan

bahaar nam ko hai asal mein bahaar kahan

jo tum nahin the to ek lutf-e-intizar to tha

tum aa gae ho to ab lutf-e-intizar kahan

chaman se dur bhi dekhi hai fasl-e-gul hum ne

magar wo silsila-e-naghma-e-bahaar kahan

numud-e-subh hui aur ujaD gai mahfil

mai-e-shabana kahan ab wo mai-gusar kahan

chaman ye shahr-e-nigaran bana to hai lekin

meri bahaar ko chhoD aai hai bahaar kahan

hui hain un se uchaTti si kuchh mulaqaten

magar ye kaif ba-andaza-e-KHumar kahan

na sina chaak hai koi na ab gareban chaak

gaya na jaane wo sarmaya-e-bahaar kahan

ba-faiz-e-azmat-e-syan mili hai ye tauqir

wagarna dar-KHur-e-rahmat gunahgar kahan

na wo sohbat-e-mazi na us ki yaad ai 'arsh'

jo karwan hi nahin hai to phir ghubar kahan