hawa-e-inqalab-e-dahr se rang-e-chaman badle

havā-e-inqalāb-e-dahr se rang-e-chaman badle

magar mumkin nahīñ tarz-e-ḳhulūs-e-fikr-o-fan badle

bayāñ ke rang lafzoñ kī qabā ke bāñkpan badle

zabāñ tak aate aate dil ne kitne pairahan badle

guzar jaatī hai ye kahtī huī shoḳhī adāoñ kī

tumhārī sādgī se kaun apnā bāñkpan badle

junūñ kī nā-tamāmī par mujhe hairat unheñ uljhan

garebāñ chaak ho jaa.e to māthe kī shikan badle

achānak terī yaad aa.ī to vo aalam huā dil kā

chaman kā rang jaise sub.h kī pahlī kiran badle

hameñ us inqilāb-e-dahr kā muzhda na do jis meñ

na phūloñ kī mahak badle na kāñToñ kī chubhan badle

kahāñ gum ho gayā vo raat kā bhīgā huā lamha

jo tere dil kī ThanDak se mire dil kī jalan badle

hawa-e-inqalab-e-dahr se rang-e-chaman badle

magar mumkin nahin tarz-e-KHulus-e-fikr-o-fan badle

bayan ke rang lafzon ki qaba ke bankpan badle

zaban tak aate aate dil ne kitne pairahan badle

guzar jati hai ye kahti hui shoKHi adaon ki

tumhaari sadgi se kaun apna bankpan badle

junun ki na-tamami par mujhe hairat unhen uljhan

gareban chaak ho jae to mathe ki shikan badle

achanak teri yaad aai to wo aalam hua dil ka

chaman ka rang jaise subh ki pahli kiran badle

hamein us inqilab-e-dahr ka muzhda na do jis mein

na phulon ki mahak badle na kanTon ki chubhan badle

kahan gum ho gaya wo raat ka bhiga hua lamha

jo tere dil ki ThanDak se mere dil ki jalan badle