hawa-e-tund ke jhonke ko aazmaunga

havā-e-tund ke jhoñke ko āzmā.ūñgā

maiñ ik diye se hazāroñ diye jalā.ūñgā

maiñ shahr shahr sadā par sadā uThā.ūñgā

galīm-posh-e-ġhazal huuñ ġhazal sunā.ūñgā

ye qist qist tabassum sulagte hoñToñ par

sajā ke ab ke bhī maiñ qatl-gāh jā.ūñgā

asīr-e-gumbad-e-tanhā.ī itnā yaad rakho

maiñ bāzgasht nahīñ huuñ ki lauT ā.ūñgā

maiñ dhuup dhuup chalūñgā ye dūsroñ ke liye

saḌak ke donoñ taraf peḌ hī lagā.ūñgā

bahut haqīr huuñ lekin añdherī rātoñ meñ

maiñ jugnuoñ kī tarah roz jagmagā.uñgā

ye karb karb kahānī ye daar daar safar

maiñ ab ke lauT ke aa.uuñ to phir sunā.ūñgā

mujhe ḳhabar hai ki haiñ saañp in sūrāḳhoñ meñ

magar dobāra maiñ in se Dasā na jā.ūñgā

maiñ lamha lamha sazā.eñ to kaaT lūñgā magar

hisār-e-arz-e-suḳhan se nikal na pā.ūñgā

hawa-e-tund ke jhonke ko aazmaunga

main ek diye se hazaron diye jalaunga

main shahr shahr sada par sada uThaunga

galim-posh-e-ghazal hun ghazal sunaunga

ye qist qist tabassum sulagte honTon par

saja ke ab ke bhi main qatl-gah jaunga

asir-e-gumbad-e-tanhai itna yaad rakho

main bazgasht nahin hun ki lauT aaunga

main dhup dhup chalunga ye dusron ke liye

saDak ke donon taraf peD hi lagaunga

bahut haqir hun lekin andheri raaton mein

main jugnuon ki tarah roz jagmagaunga

ye karb karb kahani ye dar dar safar

main ab ke lauT ke aaun to phir sunaunga

mujhe KHabar hai ki hain sanp in suraKHon mein

magar dobara main in se Dasa na jaunga

main lamha lamha sazaen to kaT lunga magar

hisar-e-arz-e-suKHan se nikal na paunga