hawa hun dhup hun barish hun ya ghaTa hun main

havā huuñ dhuup huuñ bārish huuñ yā ghaTā huuñ maiñ

nigāh-e-yār meñ koī batā.e kyā huuñ maiñ

hadīs-e-ishq huuñ aur paikar-e-vafā huuñ maiñ

vo jāntā hī nahīñ hai ki aa.inā huuñ maiñ

miTā na pā.egī duniyā ise qayāmat tak

likhī jo ḳhuuñ se vo rūdād-e-karbalā huuñ maiñ

tumheñ ye kaisā taraddud hai mujh tak aane meñ

tumhāre vāste manzil huuñ rāsta huuñ maiñ

havā ke dosh pe kab se savār huuñ lekin

zamāna phir bhī samajhtā hai ḳhāk-e-pā huuñ maiñ

rah-e-vafā meñ saraktī nahīñ jo sar se kabhī

vo sabr-o-zabt kī īsār kī ridā huuñ maiñ

ḳhudā kā shukr hai 'resham' zamāne vāloñ ko

ye rashk hai ki charāġhoñ kā silsila huuñ maiñ

hawa hun dhup hun barish hun ya ghaTa hun main

nigah-e-yar mein koi batae kya hun main

hadis-e-ishq hun aur paikar-e-wafa hun main

wo jaanta hi nahin hai ki aaina hun main

miTa na paegi duniya ise qayamat tak

likhi jo KHun se wo rudad-e-karbala hun main

tumhein ye kaisa taraddud hai mujh tak aane mein

tumhaare waste manzil hun rasta hun main

hawa ke dosh pe kab se sawar hun lekin

zamana phir bhi samajhta hai KHak-e-pa hun main

rah-e-wafa mein sarakti nahin jo sar se kabhi

wo sabr-o-zabt ki isar ki rida hun main

KHuda ka shukr hai 'resham' zamane walon ko

ye rashk hai ki charaghon ka silsila hun main