hawa jaise koi band-e-qaba-e-nastaran khole

havā jaise koī band-e-qabā-e-nastaran khole

koī to mere bāloñ se ḳhizāñ-dīda ribbon khole

parindoñ ke paroñ ko TūTte dekhūñ to TuuTe dil

magar jab bhī bahār aa.e dar-e-sub.h-e-chaman khole

mujhe pahlū meñ pā kar dekhe koī jannat-e-arzī

kisī sapne ke bose se jo āñkheñ sīm-tan khole

hamāre saath bhī us ne ka.ī mausam guzāre haiñ

hamāre haq meñ bhī shāyad zabāñ vo gul-badan khole

kitāb-e-dilbarī ham kholte haiñ us ke paḌhne ko

hamārī bāliyāñ jaise koī pāgal pavan khole

use shak hai abhī jaagī huī haiñ ḳhvāhisheñ merī

ajal rah rah ke aa.e aur har tār-e-kafan khole

mohabbat meñ uThāte haiñ halaf sab 'shāziya-akbar’

na-jāne kaun hai jo rāz-e-shām-e-anjuman khole

hawa jaise koi band-e-qaba-e-nastaran khole

koi to mere baalon se KHizan-dida ribbon khole

parindon ke paron ko TuTte dekhun to TuTe dil

magar jab bhi bahaar aae dar-e-subh-e-chaman khole

mujhe pahlu mein pa kar dekhe koi jannat-e-arzi

kisi sapne ke bose se jo aankhen sim-tan khole

hamare sath bhi us ne kai mausam guzare hain

hamare haq mein bhi shayad zaban wo gul-badan khole

kitab-e-dilbari hum kholte hain us ke paDhne ko

hamari baaliyan jaise koi pagal pawan khole

use shak hai abhi jagi hui hain KHwahishen meri

ajal rah rah ke aae aur har tar-e-kafan khole

mohabbat mein uThate hain halaf sab 'shaziya-akbar’

na-jaane kaun hai jo raaz-e-sham-e-anjuman khole