hawa ka hath pakaD kar yahan jo chalta hai

havā kā haath pakaḌ kar yahāñ jo chaltā hai

har ek dauḌ meñ aage vahī nikaltā hai

isī liye to zarā ruḳh badal ke chaltā hai

ab is zamīn pe sūraj kā paañv jaltā hai

zarūr koī na koī makān jaltā hai

julūs jab bhī mire shahr meñ nikaltā hai

ham apne shahr ke mal'ab meñ geñd kyā kheleñ

hamāre shahr kī galiyoñ meñ sar uchhaltā hai

amīr-e-shahr ke armān abhī kahāñ nikle

abhī ġharīb ke ghar meñ charāġh jaltā hai

ye kah ke jhuggiyāñ toḌīñ mahal-nashīnoñ ne

ye vo jagah hai jahāñ inqalāb paltā hai

sukūn luuT liyā shahr ke ujāloñ ne

añdherī raat meñ chhat par koī Tahaltā hai

vahāñ ḳhudā kī ḳhudā.ī pe shak ma'āz-allāh

hazār chashma-e-zamzam jahāñ ubaltā hai

ab is suḳhan meñ kisī ko bhī iḳhtilāf nahīñ

jo dūsroñ ko jalātā hai vo bhī jaltā hai

vo mere saath chale bhī to is tarah 'irfān'

ki jaise koī janāze ke saath chaltā hai

hawa ka hath pakaD kar yahan jo chalta hai

har ek dauD mein aage wahi nikalta hai

isi liye to zara ruKH badal ke chalta hai

ab is zamin pe suraj ka panw jalta hai

zarur koi na koi makan jalta hai

julus jab bhi mere shahr mein nikalta hai

hum apne shahr ke mal'ab mein gend kya khelen

hamare shahr ki galiyon mein sar uchhalta hai

amir-e-shahr ke arman abhi kahan nikle

abhi gharib ke ghar mein charagh jalta hai

ye kah ke jhuggiyan toDin mahal-nashinon ne

ye wo jagah hai jahan inqalab palta hai

sukun luT liya shahr ke ujalon ne

andheri raat mein chhat par koi Tahalta hai

wahan KHuda ki KHudai pe shak ma'az-allah

hazar chashma-e-zamzam jahan ubalta hai

ab is suKHan mein kisi ko bhi iKHtilaf nahin

jo dusron ko jalata hai wo bhi jalta hai

wo mere sath chale bhi to is tarah 'irfan'

ki jaise koi janaze ke sath chalta hai