hawa ka talKH lahja hai charaghon ki pareshani

havā kā talḳh lahja hai charāġhoñ kī pareshānī

chamakte chāñd sūraj haiñ sitāroñ kī pareshānī

kināroñ meñ bhī shāyad Duub jaane kī talab hogī

pata kaise kareñge ham kināroñ kī pareshānī

mire pyāre hamārī zindagī meñ aur bahut ġham haiñ

mohabbat hijr ye to haiñ hazāroñ kī pareshānī

ye sahrā bhī to shāyad dhuup hī se tilmilātā hai

samundar duur kar in regzāroñ kī pareshānī

na jaane kaise kaise naqsh-e-pā ko sar pe lete haiñ

ye koī kam nahīñ hai yaar pattoñ kī pareshānī

vahī bachche ki jis ko bolnā chalnā sikhāyā thā

vahī bachche hī kyuuñ haiñ aaj maaoñ kī pareshānī

daraḳhtoñ ko bhī shāyad hijratoñ ke rañg chakhne haiñ

Tahaltī Dāliyāñ kahtī haiñ peḌoñ kī pareshānī

havā.eñ chal rahī haiñ un ko ruknā ho kahīñ shāyad

patā karte chalo kyā hai havāoñ kī pareshānī

hawa ka talKH lahja hai charaghon ki pareshani

chamakte chand suraj hain sitaron ki pareshani

kinaron mein bhi shayad Dub jaane ki talab hogi

pata kaise karenge hum kinaron ki pareshani

mere pyare hamari zindagi mein aur bahut gham hain

mohabbat hijr ye to hain hazaron ki pareshani

ye sahra bhi to shayad dhup hi se tilmilata hai

samundar dur kar in regzaron ki pareshani

na jaane kaise kaise naqsh-e-pa ko sar pe lete hain

ye koi kam nahin hai yar patton ki pareshani

wahi bachche ki jis ko bolna chalna sikhaya tha

wahi bachche hi kyun hain aaj maon ki pareshani

daraKHton ko bhi shayad hijraton ke rang chakhne hain

Tahalti Daliyan kahti hain peDon ki pareshani

hawaen chal rahi hain un ko rukna ho kahin shayad

pata karte chalo kya hai hawaon ki pareshani