hawa ke lams se bhaDka bhi hun main

havā ke lams se bhaḌkā bhī huuñ maiñ

sharāra hī nahīñ shola bhī huuñ maiñ

vo jin kī aañkh kā taara bhī huuñ maiñ

un hī ke paañv kā chhālā bhī huuñ maiñ

akahrā hai mirā pairāhan-e-zāt

burā huuñ yā bhalā jaisā bhī huuñ maiñ

havā ne chhīn lī hai merī ḳhushbū

misāl-e-gul agar mahkā bhī huuñ maiñ

mire raste meñ haa.il hai jo dīvār

usī ke saa.e meñ baiThā bhī huuñ maiñ

taras jaatā huuñ jis ke dekhne ko

usī ik shaḳhs se bachtā bhī huuñ maiñ

maiñ jin logoñ kī sūrat se huuñ be-zār

unhī meñ raat din rahtā bhī huuñ maiñ

jo merī ḳhush-libāsī ke haiñ qaa.el

un hī ke sāmne nañgā bhī huuñ maiñ

sarāsar jhuuT hai jo baat merī

usī ik baat meñ sachchā bhī huuñ maiñ

agarche fitratan kam-go huuñ phir bhī

jo sach pūchho to kuchh bantā bhī huuñ maiñ

bahut is shahr meñ rusvā huuñ 'rāshid'

magar kyā vāqa.ī aisā bhī huuñ maiñ

hawa ke lams se bhaDka bhi hun main

sharara hi nahin shola bhi hun main

wo jin ki aankh ka tara bhi hun main

un hi ke panw ka chhaala bhi hun main

akahra hai mera pairahan-e-zat

bura hun ya bhala jaisa bhi hun main

hawa ne chhin li hai meri KHushbu

misal-e-gul agar mahka bhi hun main

mere raste mein hail hai jo diwar

usi ke sae mein baiTha bhi hun main

taras jata hun jis ke dekhne ko

usi ek shaKHs se bachta bhi hun main

main jin logon ki surat se hun be-zar

unhi mein raat din rahta bhi hun main

jo meri KHush-libasi ke hain qael

un hi ke samne nanga bhi hun main

sarasar jhuT hai jo baat meri

usi ek baat mein sachcha bhi hun main

agarche fitratan kam-go hun phir bhi

jo sach puchho to kuchh banta bhi hun main

bahut is shahr mein ruswa hun 'rashid'

magar kya waqai aisa bhi hun main