hawa ke ruKH par charagh-e-ulfat ki lau baDha kar chala gaya hai

havā ke ruḳh par charāġh-e-ulfat kī lau baḌhā kar chalā gayā hai

vo ik diye se na jaane kitne diye jalā kar chalā gayā hai

ham us kī bātoñ kī bārishoñ meñ har ek mausam meñ bhīgte the

vo apnī chāhat ke saare manzar hameñ dikhā kar chalā gayā hai

usī ke baare meñ harf likkhe usī pe ham ne ġhazal kahī hai

jo kajlī āñkhoñ se mere dil meñ naqab lagā kar chalā gayā hai

matā-e-jāñ bhī usī pe vaarī usī ke dam se hai saañs jaarī

mire badan meñ vo ḳhushbuoñ kī havā basā kar chalā gayā hai

ye fasl-e-fikr-o-ḳhayāl apnī usī ke dam se harī-bharī hai

jo kachche koThoñ ke āñganoñ se dhuāñ uThā kar chalā gayā hai

hamārī āñkhoñ meñ ratjage kī jhaḌī lagī hai usī ghaḌī se

ki jab se koī ġhazāl apnī jhalak dikhā kar chalā gayā hai

hiran mohabbat ke sabza-zāroñ meñ jaane kab chaukḌī bhareñge

vo jaate jaate savāl aisā 'hasan' uThā kar chalā gayā hai

hawa ke ruKH par charagh-e-ulfat ki lau baDha kar chala gaya hai

wo ek diye se na jaane kitne diye jala kar chala gaya hai

hum us ki baaton ki barishon mein har ek mausam mein bhigte the

wo apni chahat ke sare manzar hamein dikha kar chala gaya hai

usi ke bare mein harf likkhe usi pe hum ne ghazal kahi hai

jo kajli aankhon se mere dil mein naqab laga kar chala gaya hai

mata-e-jaan bhi usi pe wari usi ke dam se hai sans jari

mere badan mein wo KHushbuon ki hawa basa kar chala gaya hai

ye fasl-e-fikr-o-KHayal apni usi ke dam se hari-bhari hai

jo kachche koThon ke aanganon se dhuan uTha kar chala gaya hai

hamari aankhon mein ratjage ki jhaDi lagi hai usi ghaDi se

ki jab se koi ghazal apni jhalak dikha kar chala gaya hai

hiran mohabbat ke sabza-zaron mein jaane kab chaukDi bharenge

wo jate jate sawal aisa 'hasan' uTha kar chala gaya hai