hawa ki zad pe charaghon ne raushni ki hai

havā kī zad pe charāġhoñ ne raushnī kī hai

basar 'urūj pe in sab ne zindagī kī hai

mirī nazar meñ ye tauhīn-e-'āshiqī kī hai

nahīñ hai pyaar to kyoñ us ne dil-lagī kī hai

huqūq salb kiye jā rahe haiñ jab us ke

hai be-kasī kī 'alāmat ki ḳhud-kushī kī hai

tahī ho jaam to is kā nahīñ hai ġham mujh ko

kisī kī mast nigāhoñ ne mai-kashī kī hai

nahīñ javāb jahāñgīr kī 'adālat kā

lagā ke jaan kī baazī bhī munsifī kī hai

misāl aur to tārīḳh meñ nahīñ miltī

ki ham ne apne 'adū se bhī dostī kī hai

sharaf ye dūsrī maḳhlūq ko nahīñ hāsil

rasā.ī 'arsh-e-mu'allā pe aadmī kī hai

jalā ke dil ko ujālā kiyā hai mahfil meñ

hujūm-e-ġham meñ 'kashish' ham ne shā'irī kī hai

hawa ki zad pe charaghon ne raushni ki hai

basar 'uruj pe in sab ne zindagi ki hai

meri nazar mein ye tauhin-e-'ashiqi ki hai

nahin hai pyar to kyon us ne dil-lagi ki hai

huquq salb kiye ja rahe hain jab us ke

hai be-kasi ki 'alamat ki KHud-kushi ki hai

tahi ho jam to is ka nahin hai gham mujh ko

kisi ki mast nigahon ne mai-kashi ki hai

nahin jawab jahangir ki 'adalat ka

laga ke jaan ki bazi bhi munsifi ki hai

misal aur to tariKH mein nahin milti

ki hum ne apne 'adu se bhi dosti ki hai

sharaf ye dusri maKHluq ko nahin hasil

rasai 'arsh-e-mu'alla pe aadmi ki hai

jala ke dil ko ujala kiya hai mahfil mein

hujum-e-gham mein 'kashish' hum ne sha'iri ki hai