hawa mein nauhe ghule durd mishalon mein raha

havā meñ nauhe ghule durd mish.aloñ meñ rahā

bahut ajiib sā dukh thā ki bastiyoñ meñ rahā

tamām peḌ the sāhil pe aag kī zad meñ

mire qabīle kā har fard pāniyoñ meñ rahā

bahut dilāse diye ham ne shab-gazīda ko

magar vo shaḳhs ki din meñ bhī vasvasoñ meñ rahā

vahī thā āḳhirī nuqta mirī lakīroñ kā

har ek qaus meñ vo saare zāviyoñ meñ rahā

ye jānte bhī ki saarā safar ḳhalā kā hai

balā kā hausla TuuTe hue paroñ meñ rahā

bharī bahār hare ḳhvāb ke gulāb liye

tamām umr maiñ ujḌī huī rutoñ meñ rahā

qarīb aa.e to sūraj bhī bujh ga.e 'qayyūm'

siyāh barf kī sūrat lahū ragoñ meñ rahā

hawa mein nauhe ghule durd mishalon mein raha

bahut ajib sa dukh tha ki bastiyon mein raha

tamam peD the sahil pe aag ki zad mein

mere qabile ka har fard paniyon mein raha

bahut dilase diye hum ne shab-gazida ko

magar wo shaKHs ki din mein bhi waswason mein raha

wahi tha aaKHiri nuqta meri lakiron ka

har ek qaus mein wo sare zawiyon mein raha

ye jaante bhi ki sara safar KHala ka hai

bala ka hausla TuTe hue paron mein raha

bhari bahaar hare KHwab ke gulab liye

tamam umr main ujDi hui ruton mein raha

qarib aae to suraj bhi bujh gae 'qayyum'

siyah barf ki surat lahu ragon mein raha