hawa-o-hirs ki duniya mein dar-ba-dar hue hum

havā-o-hirs kī duniyā meñ dar-ba-dar hue ham

ḳhabar jahāñ kī rakhī ḳhud se be-ḳhabar hue ham

qafas meñ the to par-o-bāl the sharīk-e-malāl

chaman meñ aa.e to mahrūm-e-bāl-o-par hue ham

kanāra-gīr tamāshā.iyoñ se kaisā gila

har ek mauja-e-tūfāñ ke ham-safar hue ham

hamāre hausle kī daad to adū ne bhī dī

chale haiñ nāvak-e-dushnām to sipar hue ham

vo jis safar meñ murād-e-safar yaqīnī thī

usī safar pe na āmāda-e-safar hue ham

hamārī manzilat-o-qadr apne fan se hai

hunar-shanās hue ham to mo'atabar hue ham

hamāre paas hai 'mohsin' matā-e-hairānī

vo intizār rahā hai ki chashm-e-dar hue ham

hawa-o-hirs ki duniya mein dar-ba-dar hue hum

KHabar jahan ki rakhi KHud se be-KHabar hue hum

qafas mein the to par-o-baal the sharik-e-malal

chaman mein aae to mahrum-e-baal-o-par hue hum

kanara-gir tamashaiyon se kaisa gila

har ek mauja-e-tufan ke ham-safar hue hum

hamare hausle ki dad to adu ne bhi di

chale hain nawak-e-dushnam to sipar hue hum

wo jis safar mein murad-e-safar yaqini thi

usi safar pe na aamada-e-safar hue hum

hamari manzilat-o-qadr apne fan se hai

hunar-shanas hue hum to mo'atabar hue hum

hamare pas hai 'mohsin' mata-e-hairani

wo intizar raha hai ki chashm-e-dar hue hum