hawas-e-zulf-e-girah-gir liye baiThe hain

havas-e-zulf-e-girah-gīr liye baiThe haiñ

āyat-e-shauq kī tafsīr liye baiThe haiñ

āsmāñ saath chalā ghar kī zamīñ duur huī

tujh se duur ik rah-e-dil-gīr liye baiThe haiñ

vaj.h-e-ta.azīr huī be-vatanī bhī jab se

ambarīñ hāthoñ kī tahrīr liye baiThe haiñ

aap se aap vo khultī huī zulfeñ terī

ab isī sog kī tasvīr liye baiThe haiñ

haa.e kyā ahd-e-javānī-o-mohabbat hai ki ham

ik na ik marne kī tadbīr liye baiThe haiñ

zindagī be-dar-o-dīvār makāñ hai koī

kab se ik hasrat-e-tāmīr liye baiThe haiñ

koī apnoñ hī meñ qātil hai to ham chup se 'shahāb'

zaḳhm khaa.e hue shamshīr liye baiThe haiñ

hawas-e-zulf-e-girah-gir liye baiThe hain

aayat-e-shauq ki tafsir liye baiThe hain

aasman sath chala ghar ki zamin dur hui

tujh se dur ek rah-e-dil-gir liye baiThe hain

wajh-e-tazir hui be-watani bhi jab se

ambarin hathon ki tahrir liye baiThe hain

aap se aap wo khulti hui zulfen teri

ab isi sog ki taswir liye baiThe hain

hae kya ahd-e-jawani-o-mohabbat hai ki hum

ek na ek marne ki tadbir liye baiThe hain

zindagi be-dar-o-diwar makan hai koi

kab se ek hasrat-e-tamir liye baiThe hain

koi apnon hi mein qatil hai to hum chup se 'shahab'

zaKHm khae hue shamshir liye baiThe hain