haya iKHfa-e-raaz-e-dil ki ek tadbir hoti hai

hayā iḳhfā-e-rāz-e-dil kī ik tadbīr hotī hai

nazar jhuktī hai vo jis meñ koī tahrīr hotī hai

rivāj-e-zahmat-e-iz.hār dī jaatī hai hoñToñ ko

mohabbat meñ ḳhamoshī varna ḳhud taqrīr hotī hai

har ik dīvāna pāband-e-vafā rahtā hai āḳhir tak

junūñ ke paañv meñ bhī hosh kī zanjīr hotī hai

sabhī karte haiñ da.ave sāhib-e-īmān hone kā

magar har dil ke ā.īne meñ ik tasvīr hotī hai

jahāñ barq-e-tapāñ kī yūrish-e-paiham kā imkāñ ho

umūman āshiyāne kī vahīñ ta.amīr hotī hai

na jaane kaun se ḳhush-baḳht kā ye qaul hai 'arshad'

ki āh-e-sub.h-gāhī meñ baḌī tāsīr hotī hai

haya iKHfa-e-raaz-e-dil ki ek tadbir hoti hai

nazar jhukti hai wo jis mein koi tahrir hoti hai

riwaj-e-zahmat-e-izhaar di jati hai honTon ko

mohabbat mein KHamoshi warna KHud taqrir hoti hai

har ek diwana paband-e-wafa rahta hai aaKHir tak

junun ke panw mein bhi hosh ki zanjir hoti hai

sabhi karte hain dawe sahib-e-iman hone ka

magar har dil ke aaine mein ek taswir hoti hai

jahan barq-e-tapan ki yurish-e-paiham ka imkan ho

umuman aashiyane ki wahin tamir hoti hai

na jaane kaun se KHush-baKHt ka ye qaul hai 'arshad'

ki aah-e-subh-gahi mein baDi tasir hoti hai