hayat-e-dard musalsal bhi intishaar bhi hai

hayāt-e-dard musalsal bhī intishār bhī hai

qarār DhūñDne vaalo kahīñ qarār bhī hai

shamīm-e-gul se sulagtā hai dāman-e-ehsās

ki terī nik.hat-e-poshāk sho.ala-bār bhī hai

zamāna ḳhud nazar aatā nahīñ zamāne ko

ki dil kā aa.ina ālūda-e-ġhubār bhī hai

zabāñ se kahiye to kyoñ kahiye us kī mahfil meñ

vo dil kā haal jo sūrat se āshkār bhī hai

ye chāhtā hai ki kaunain kā ḳhudā ban jaa.e

vo aadmī jise thoḌā sā iḳhtiyār bhī hai

bahār le ga.ī jin vahshiyoñ ko sahrā meñ

chaman ko un ke palaTne kā intizār bhī hai

Thahar ke dīda-e-nargis meñ os kī būñdeñ

ye kah rahī haiñ ki gul hañs ke ashk-bār bhī hai

nigāh-e-rashk se dekho na ahl-e-sarvat ko

bahār hai magar us kā kuchh e'tibār bhī hai

zamāna ek kasauTī hai dostoñ ke liye

haiñ rāzdār bahut koī ġham-gusār bhī hai

milī hai ishq se 'sīmā' jise bhī daulat-e-ġham

usī ko sozish-e-har-zaḳhm ḳhush-gavār bhī hai

hayat-e-dard musalsal bhi intishaar bhi hai

qarar DhunDne walo kahin qarar bhi hai

shamim-e-gul se sulagta hai daman-e-ehsas

ki teri nikhat-e-poshak shoala-bar bhi hai

zamana KHud nazar aata nahin zamane ko

ki dil ka aaina aaluda-e-ghubar bhi hai

zaban se kahiye to kyon kahiye us ki mahfil mein

wo dil ka haal jo surat se aashkar bhi hai

ye chahta hai ki kaunain ka KHuda ban jae

wo aadmi jise thoDa sa iKHtiyar bhi hai

bahaar le gai jin wahshiyon ko sahra mein

chaman ko un ke palaTne ka intizar bhi hai

Thahar ke dida-e-nargis mein os ki bunden

ye kah rahi hain ki gul hans ke ashk-bar bhi hai

nigah-e-rashk se dekho na ahl-e-sarwat ko

bahaar hai magar us ka kuchh e'tibar bhi hai

zamana ek kasauTi hai doston ke liye

hain raazdar bahut koi gham-gusar bhi hai

mili hai ishq se 'sima' jise bhi daulat-e-gham

usi ko sozish-e-har-zaKHm KHush-gawar bhi hai