hayat-o-maut ke parde uTha diye jaen

hayāt-o-maut ke parde uThā diye jaa.eñ

ki ab nuqūsh-e-haqīqat dikhā diye jaa.eñ

tamām raat mire saath jale haiñ tanhā

sahar qarīb hai dīpak bujhā diye jaa.eñ

hamāre daur meñ hukkām kī ye sāzish hai

ki ḳhaam niiñv pe aivāñ banā diye jaa.eñ

zarā sī der kī ḳhushiyoñ ne un ko luuT liyā

udāsiyoñ ke nagar phir basā diye jaa.eñ

ḳhulūs-o-dostī biite dinoñ kī bāteñ haiñ

ki taaq par ye guhar ab sajā diye jaa.eñ

koī javāb hī jin kā na ban paḌe tum se

jo vo savāl hī ab ke uThā diye jaa.eñ

jo ham chale haiñ na.e naqsh ab kareñ paidā

tamām naqsh-e-kaf-e-pā miTā diye jaa.eñ

na.e haiñ taur tarīqe nizām-e-nau hai kañval

purāne daur ke qisse bhulā diye jaa.eñ

hayat-o-maut ke parde uTha diye jaen

ki ab nuqush-e-haqiqat dikha diye jaen

tamam raat mere sath jale hain tanha

sahar qarib hai dipak bujha diye jaen

hamare daur mein hukkaam ki ye sazish hai

ki KHam ninw pe aiwan bana diye jaen

zara si der ki KHushiyon ne un ko luT liya

udasiyon ke nagar phir basa diye jaen

KHulus-o-dosti bite dinon ki baaten hain

ki taq par ye guhar ab saja diye jaen

koi jawab hi jin ka na ban paDe tum se

jo wo sawal hi ab ke uTha diye jaen

jo hum chale hain nae naqsh ab karen paida

tamam naqsh-e-kaf-e-pa miTa diye jaen

nae hain taur tariqe nizam-e-nau hai kanwal

purane daur ke qisse bhula diye jaen