hazar gham hon to phir intiKHab kaise karun

hazār ġham hoñ to phir intiḳhāb kaise karūñ

darīda dil ko maiñ nazr-e-azāb kaise karūñ

maiñ us ko bhuul chukā thā ka.ī baras ke baad

milī hai vasl kī saa.at hisāb kaise karūñ

vahī hai ishq kī manzil vahī vafā kā safar

khulī jo aañkh zarā zikr-e-ḳhvāb kaise karūñ

ġham-e-hayāt kī ab koī intihā hī nahīñ

maiñ apnī zaat ko vaqf-e-sarāb kaise karūñ

ye shahr-e-dard hai ai dostān-e-dil-zadgāñ

vafā shumār karūñ ehtisāb kaise karūñ

vahī hai azmat o jaah o hasham vahī mansab

faqīh-e-shahr vahī hai ḳhitāb kaise karūñ

'sabā' vo shaḳhs abhī tak hai mujh se begāna

maiñ us kī zaat se phir intisāb kaise karūñ

hazar gham hon to phir intiKHab kaise karun

darida dil ko main nazr-e-azab kaise karun

main us ko bhul chuka tha kai baras ke baad

mili hai wasl ki saat hisab kaise karun

wahi hai ishq ki manzil wahi wafa ka safar

khuli jo aankh zara zikr-e-KHwab kaise karun

gham-e-hayat ki ab koi intiha hi nahin

main apni zat ko waqf-e-sarab kaise karun

ye shahr-e-dard hai ai dostan-e-dil-zadgan

wafa shumar karun ehtisab kaise karun

wahi hai azmat o jah o hasham wahi mansab

faqih-e-shahr wahi hai KHitab kaise karun

'saba' wo shaKHs abhi tak hai mujh se begana

main us ki zat se phir intisab kaise karun