hazar hadsat-e-gham rawan-dawan liye hue

hazār hādsāt-e-ġham ravāñ-davāñ liye hue

kahāñ chalī hai zindagī kashāñ kashāñ liye hue

mire nasīb kī ye zulmateñ na miT sakīñ kabhī

koī guzar gayā hazār kahkashāñ liye hue

ye zindagī badalte mausamoñ kā rañg-rūp hai

kabhī bahār kā samāñ kabhī ḳhizāñ liye hue

mirā ye karb hai ki merā kārvāñ guzar gayā

simaT ke rah gayā huuñ gard-e-kārvāñ liye hue

agar vo jān-e-ārzū mile to us kī nazr ho

khaḌā huuñ kab se muntazir maiñ naqd-e-jāñ liye hue

mire vaqār kā savāl thā maiñ kuchh na kah sakā

guzar ga.e vo rāhatoñ kā ik jahāñ liye hue

kisī bhī zāviye se 'arsh' is ko dekhiye magar

qadam qadam pe zindagī hai imtihāñ liye hue

hazar hadsat-e-gham rawan-dawan liye hue

kahan chali hai zindagi kashan kashan liye hue

mere nasib ki ye zulmaten na miT sakin kabhi

koi guzar gaya hazar kahkashan liye hue

ye zindagi badalte mausamon ka rang-rup hai

kabhi bahaar ka saman kabhi KHizan liye hue

mera ye karb hai ki mera karwan guzar gaya

simaT ke rah gaya hun gard-e-karwan liye hue

agar wo jaan-e-arzu mile to us ki nazr ho

khaDa hun kab se muntazir main naqd-e-jaan liye hue

mere waqar ka sawal tha main kuchh na kah saka

guzar gae wo rahaton ka ek jahan liye hue

kisi bhi zawiye se 'arsh' is ko dekhiye magar

qadam qadam pe zindagi hai imtihan liye hue