hazar hikmaten zehnon mein Dal deta hai

hazār hikmateñ zehnoñ meñ Daal detā hai

musībatoñ se vo sab ko nikāl detā hai

chamaktī chīzoñ pe huzn-o-malāl detā hai

ḳhushī meñ ranj kā pahlū nikāl detā hai

sab us kī maslihateñ haiñ bashar ko duniyā meñ

kabhī 'urūj kabhī vo zavāl detā hai

sabhī ko miltā nahīñ mansab-e-ḳhud-āgāhī

kisī kisī ko ḳhudā ye kamāl detā hai

usī ke dam se hai baaqī ye raunaq-e-duniyā

jo āñdhiy.oñ meñ diyoñ ko ujaal detā hai

vo apne bandoñ kī sab hājateñ samajhtā hai

har ek chiiz hameñ hasb-e-hāl detā hai

vahī zamāne meñ kartā hai surḳh-rū ham ko

hunar hameñ jo ‘adīm-ul-misāl detā hai

nazar jo pher le kangāl ho ke rah jaa.eñ

jo aa.e dene pe kasrat se maal detā hai

vo is liye ki natīja ba-ḳhair ho sab kā

hamāre zehnoñ ko fikr-e-ma.āl detā hai

usī ke fazl se zehn-e-rasā milā ham ko

vahī hai jo hameñ ūñche ḳhayāl detā hai

ye nāḳhudā kā nahīñ hai ḳhudā kā kaam 'zakī'

bhañvar se jo mirī kashtī nikāl detā hai

hazar hikmaten zehnon mein Dal deta hai

musibaton se wo sab ko nikal deta hai

chamakti chizon pe huzn-o-malal deta hai

KHushi mein ranj ka pahlu nikal deta hai

sab us ki maslihaten hain bashar ko duniya mein

kabhi 'uruj kabhi wo zawal deta hai

sabhi ko milta nahin mansab-e-KHud-agahi

kisi kisi ko KHuda ye kamal deta hai

usi ke dam se hai baqi ye raunaq-e-duniya

jo aandhiyon mein diyon ko ujal deta hai

wo apne bandon ki sab hajaten samajhta hai

har ek chiz hamein hasb-e-haal deta hai

wahi zamane mein karta hai surKH-ru hum ko

hunar hamein jo ‘adim-ul-misal deta hai

nazar jo pher le kangal ho ke rah jaen

jo aae dene pe kasrat se mal deta hai

wo is liye ki natija ba-KHair ho sab ka

hamare zehnon ko fikr-e-maal deta hai

usi ke fazl se zehn-e-rasa mila hum ko

wahi hai jo hamein unche KHayal deta hai

ye naKHuda ka nahin hai KHuda ka kaam 'zaki'

bhanwar se jo meri kashti nikal deta hai