hazar koshish ka hai natija ki bebasi ko samajh gaya hun

hazār koshish kā hai natīja ki bebasī ko samajh gayā huuñ

maiñ ḳhud ko barbād kar rahā huuñ tirī ḳhushī ko samajh gayā huuñ

mirī nazar ke mushāhide meñ avaam kī sarfaroshiyāñ haiñ

maiñ qaisarān-e-jahāñ ke asbāb-e-qaisarī ko samajh gayā huuñ

amal se mahrūm ye taqāze faqat nazariye faqat irāde

ye zindagī zindagī nahīñ hai maiñ zindagī ko samajh gayā huuñ

ai mere mā'būdiyat ke da.ave pe laakh fatve lagāne vaalo

merā koī jurm hai to ye hai maiñ bandagī ko samajh gayā huuñ

rifāqat-e-hūr kī havas meñ butoñ kī tauhīn kar rahā hai

janāb-e-vā.iz maiñ is ḳhudā ke ḳhushāmadī ko samajh gayā huuñ

faroġh-e-tahzīb-o-irtiqā kī bulandiyāñ haiñ mirī nazar meñ

ḳhudā kī azmat se munharif huuñ maiñ aadmī ko samajh gayā huuñ

mujhe yaqīñ hai na ho sakegā ye qāfila kāmyāb manzil

maiñ rahbaroñ ke haqīqī jazbāt-e-rahbarī ko samajh gayā huuñ

hazar koshish ka hai natija ki bebasi ko samajh gaya hun

main KHud ko barbaad kar raha hun teri KHushi ko samajh gaya hun

meri nazar ke mushahide mein awam ki sarfaroshiyan hain

main qaisaran-e-jahan ke asbab-e-qaisari ko samajh gaya hun

amal se mahrum ye taqaze faqat nazariye faqat irade

ye zindagi zindagi nahin hai main zindagi ko samajh gaya hun

ai mere ma'budiyat ke dawe pe lakh fatwe lagane walo

mera koi jurm hai to ye hai main bandagi ko samajh gaya hun

rifaqat-e-hur ki hawas mein buton ki tauhin kar raha hai

janab-e-waiz main is KHuda ke KHushamadi ko samajh gaya hun

farogh-e-tahzib-o-irtiqa ki bulandiyan hain meri nazar mein

KHuda ki azmat se munharif hun main aadmi ko samajh gaya hun

mujhe yaqin hai na ho sakega ye qafila kaamyab manzil

main rahbaron ke haqiqi jazbaat-e-rahbari ko samajh gaya hun