hazar rah mein aaya karen nasheb-o-faraaz

hazār raah meñ aaya kareñ nasheb-o-farāz

mazā to jab hai ki TuuTe na himmat-e-tag-o-tāz

jo dekh letī hai vīrāne meñ bahār-e-chaman

tujhe nasīb kahāñ aisī chashm-e-jalva-tarāz

numūd-e-sub.h kā kyoñ muntazir hai dīvāne

duā ye maañg shab-e-hijr kī ho umr darāz

mayassar aa na sakī tujh ko fitrat-e-mahmūd

agarche dil hai tirā mubtalā-e-zulf-e-ayāz

tū ek kā ho to kuchh aa.e lutf sajdoñ kā

har ek dar pe jhukātā hai kyoñ jabīn-e-niyāz

nasīb kyā hoñ tirī anjuman ko parvāne

milā na dil ko tire misl-e-sham.a soz-o-gudāz

tirī nigāh ne paayā hai sāmrī kā fusūñ

mirī nazar meñ asā-e-kalīm kā e.ajāz

ma.āl-e-shām-e-ġham-e-zindagī kī fikr na kar

hanūz baaqī hai ik aur sub.h kā āġhāz

jalā sakegī na zinhār ātish-e-namrūd

hai shart ye ki hoñ tujh meñ ḳhalīl ke andāz

na rah sakā gul-o-bulbul kā raaz bhī pinhāñ

sabā to kyā ki chaman saarā ban gayā ġhammāz

tire vajūd ke asrār ko maiñ kyā samjhūñ

mirā vajūd mire vāste hai ḳhud ik raaz

use to chāhiye āzādī-e-fazā-e-chaman

qafas meñ kyā koī dikhlā.e quvvat-e-parvāz

kisī kī yaad meñ masrūf-e-ashk-bārī huuñ

yahī hai merā vuzū aur yahī hai merī namāz

maiñ vo huuñ jis pe kabhī un ko naaz thā 'najmī'

kareñ vo laakh haqīqat ko ab nazar-andāz

hazar rah mein aaya karen nasheb-o-faraaz

maza to jab hai ki TuTe na himmat-e-tag-o-taz

jo dekh leti hai virane mein bahaar-e-chaman

tujhe nasib kahan aisi chashm-e-jalwa-taraaz

numud-e-subh ka kyon muntazir hai diwane

dua ye mang shab-e-hijr ki ho umr daraaz

mayassar aa na saki tujh ko fitrat-e-mahmud

agarche dil hai tera mubtala-e-zulf-e-ayaz

tu ek ka ho to kuchh aae lutf sajdon ka

har ek dar pe jhukata hai kyon jabin-e-niyaz

nasib kya hon teri anjuman ko parwane

mila na dil ko tere misl-e-shama soz-o-gudaz

teri nigah ne paya hai samri ka fusun

meri nazar mein asa-e-kalim ka eajaz

maal-e-sham-e-gham-e-zindagi ki fikr na kar

hanuz baqi hai ek aur subh ka aaghaz

jala sakegi na zinhaar aatish-e-namrud

hai shart ye ki hon tujh mein KHalil ke andaz

na rah saka gul-o-bulbul ka raaz bhi pinhan

saba to kya ki chaman sara ban gaya ghammaz

tere wajud ke asrar ko main kya samjhun

mera wajud mere waste hai KHud ek raaz

use to chahiye aazadi-e-faza-e-chaman

qafas mein kya koi dikhlae quwwat-e-parwaz

kisi ki yaad mein masruf-e-ashk-bari hun

yahi hai mera wuzu aur yahi hai meri namaz

main wo hun jis pe kabhi un ko naz tha 'najmi'

karen wo lakh haqiqat ko ab nazar-andaz