hazar ranj-e-safar hai hazar ke hote hue

hazār ranj-e-safar hai hazar ke hote hue

ye kaisī ḳhāna-badoshī hai ghar ke hote hue

vo habs-e-jāñ hai barasne se bhī jo kam na huā

ghuTan ġhazab kī hai ik chashm-e-tar ke hote hue

mire vajūd ko paikar kī hai talāsh abhī

maiñ ḳhaak huuñ hunar-e-kuzah-gar ke hote hue

sahar ujālne vaale kiran kiran ke liye

taras rahe haiñ faroġh-e-sahar ke hote hue

har inkishāf hai ik inkishāf-e-lā-ilmī

kamāl-e-be-ḳhabarī hai ḳhabar ke hote hue

gurezāñ mujh se rahā hai ye sāya-e-dīvār

maiñ dhuup dhuup jalā huuñ shajar ke hote hue

ham us se mil ke kareñ arz-e-hāl kuchh 'irfān'

muhāl hai ye dil-e-hīla-gar ke hote hue

hazar ranj-e-safar hai hazar ke hote hue

ye kaisi KHana-badoshi hai ghar ke hote hue

wo habs-e-jaan hai barasne se bhi jo kam na hua

ghuTan ghazab ki hai ek chashm-e-tar ke hote hue

mere wajud ko paikar ki hai talash abhi

main KHak hun hunar-e-kuzah-gar ke hote hue

sahar ujalne wale kiran kiran ke liye

taras rahe hain farogh-e-sahar ke hote hue

har inkishaf hai ek inkishaf-e-la-ilmi

kamal-e-be-KHabari hai KHabar ke hote hue

gurezan mujh se raha hai ye saya-e-diwar

main dhup dhup jala hun shajar ke hote hue

hum us se mil ke karen arz-e-haal kuchh 'irfan'

muhaal hai ye dil-e-hila-gar ke hote hue