hazar ranj uThata hai ek KHushi ke liye

hazār ranj uThātā hai ik ḳhushī ke liye

ye zindagī bhī aziyyat hai aadmī ke liye

vo dil ki jis ko kisī haal meñ qarār na thā

bichhaḌ ke tum se dhaḌaktā nahīñ kisī ke liye

ḳhushā ki ham ne ruḳh-e-zindagī nikhār diyā

ġhazab ki ham hī taraste haiñ zindagī ke liye

na jaane kyoñ mirī āñkhoñ meñ aa ga.e aañsū

kisī ne haath baḌhāyā jo dostī ke liye

diyā hai sāqi-e-mahfil ne jām-e-mai sab ko

magar nigāh uThī hai kisī kisī ke liye

hazār-haif vahī raushnī se haiñ mahrūm

diye jinhoñ ne jalā.e the raushnī ke liye

nasīb kahte haiñ is ko ki umr bhar 'afzal'

guloñ meñ rah ke taraste rahe hañsī ke liye

hazar ranj uThata hai ek KHushi ke liye

ye zindagi bhi aziyyat hai aadmi ke liye

wo dil ki jis ko kisi haal mein qarar na tha

bichhaD ke tum se dhaDakta nahin kisi ke liye

KHusha ki hum ne ruKH-e-zindagi nikhaar diya

ghazab ki hum hi taraste hain zindagi ke liye

na jaane kyon meri aankhon mein aa gae aansu

kisi ne hath baDhaya jo dosti ke liye

diya hai saqi-e-mahfil ne jam-e-mai sab ko

magar nigah uThi hai kisi kisi ke liye

hazar-haif wahi raushni se hain mahrum

diye jinhon ne jalae the raushni ke liye

nasib kahte hain is ko ki umr bhar 'afzal'

gulon mein rah ke taraste rahe hansi ke liye