hazar shewa-e-rangin hai ek jafa ke liye

hazār sheva-e-rañgīñ hai ik jafā ke liye

nigāh chāhiye nairan.gi-e-adā ke liye

savād-e-fikr se ubhrī tirī hasīn nigāh

maiñ sham' DhūñDh rahā thā rah-e-vafā ke liye

vo ranj-e-rāh ho yā ḳhauf-e-gumrahī ai dost

jo rāh-rau ke liye hai vo rahnumā ke liye

ye bandagī ye riyāzat ye zohd ye taqvā

ye sab ḳhudī ke liye hai ki hai ḳhudā ke liye

ye vaqt vo hai ki dīvāna toḌ de zanjīr

ki khul rahī hai vo zulf-e-siyah du'ā ke liye

miTā miTā ke banā.e ga.e ḳham-e-gesū

paḌī girah pe girah ek mubtalā ke liye

sukūt-e-shab meñ ki Thahrī hai kā.enāt kī nabz

dil āshnā kā dhaḌaktā hai āshnā ke liye

bas ek nigāh ne donoñ ko de rakhā hai fareb

'razā' tumhāre liye hai na tum razā ke liye

hazar shewa-e-rangin hai ek jafa ke liye

nigah chahiye nairangi-e-ada ke liye

sawad-e-fikr se ubhri teri hasin nigah

main sham' DhunDh raha tha rah-e-wafa ke liye

wo ranj-e-rah ho ya KHauf-e-gumrahi ai dost

jo rah-rau ke liye hai wo rahnuma ke liye

ye bandagi ye riyazat ye zohd ye taqwa

ye sab KHudi ke liye hai ki hai KHuda ke liye

ye waqt wo hai ki diwana toD de zanjir

ki khul rahi hai wo zulf-e-siyah du'a ke liye

miTa miTa ke banae gae KHam-e-gesu

paDi girah pe girah ek mubtala ke liye

sukut-e-shab mein ki Thahri hai kaenat ki nabz

dil aashna ka dhaDakta hai aashna ke liye

bas ek nigah ne donon ko de rakha hai fareb

'raza' tumhaare liye hai na tum raza ke liye