hazar shukr kabhi tera aasra na gaya

hazār shukr kabhī terā aasrā na gayā

magar ye hai dil-e-ādam ki vasvasa na gayā

vo jab ki ziist bhī ik fan thī vo zamāna gayā

ab ek chīḳh ki andāz-e-shā.irāna gayā

bahut hī shor thā ahal junūñ kā par ab ke

ḳhirad se aa ke koī zor aazmā na gayā

chalī hai ab ke baras vo havā-e-shiddat-e-barf

dayār-e-dil kī taraf koī qāfila na gayā

bahut hī sastī hai bāzār-e-jāñ meñ jins-e-vafā

are ye qaht-talab dil kā kārḳhāna gayā

maiñ toḌ toḌ ke ḳhud ko banātā rahtā huuñ

ab ek umr huī phir bhī bachpanā na gayā

bas ek ghūñT mohabbat kā pī ke pachhtā.e

tamām umr vo ik talḳh zā.iqa na gayā

kabhī bikhar ga.e bātoñ meñ misl-e-nig.hat-e-gul

kabhī kalī kī tarah muñh se kuchh kahā na gayā

gumān ye thā ki bas do-qadam hai us kī galī

qadam uThe to yahī do-qadam chalā na gayā

maiñ ek barg-e-ḳhizāñ-dīda huuñ zamīn kā bojh

havā-e-dahr tire dosh par uḌā na gayā

ba-rañg-e-gul rahe ham bhī mizāj-dān-e-bahār

bas ek baar hañse phir kabhī hañsā na gayā

ab aao din kī kahānī likheñ koī 'bāqar'

ki raat ḳhatm huī raat kā fasāna gayā

hazar shukr kabhi tera aasra na gaya

magar ye hai dil-e-adam ki waswasa na gaya

wo jab ki zist bhi ek fan thi wo zamana gaya

ab ek chiKH ki andaz-e-shairana gaya

bahut hi shor tha ahal junun ka par ab ke

KHirad se aa ke koi zor aazma na gaya

chali hai ab ke baras wo hawa-e-shiddat-e-barf

dayar-e-dil ki taraf koi qafila na gaya

bahut hi sasti hai bazar-e-jaan mein jins-e-wafa

are ye qaht-talab dil ka karKHana gaya

main toD toD ke KHud ko banata rahta hun

ab ek umr hui phir bhi bachpana na gaya

bas ek ghunT mohabbat ka pi ke pachhtae

tamam umr wo ek talKH zaiqa na gaya

kabhi bikhar gae baaton mein misl-e-nighat-e-gul

kabhi kali ki tarah munh se kuchh kaha na gaya

guman ye tha ki bas do-qadam hai us ki gali

qadam uThe to yahi do-qadam chala na gaya

main ek barg-e-KHizan-dida hun zamin ka bojh

hawa-e-dahr tere dosh par uDa na gaya

ba-rang-e-gul rahe hum bhi mizaj-dan-e-bahaar

bas ek bar hanse phir kabhi hansa na gaya

ab aao din ki kahani likhen koi 'baqar'

ki raat KHatm hui raat ka fasana gaya