hazar wade kiye hain tumne kabhi kisi ko wafa na karna

hazār vā'de kiye haiñ tum ne kabhī kisī ko vafā na karnā

chalo usī par jo ġhair kah deñ kahīñ hamārā kahā na karnā

agar na sunte ho baat merī to sabr aa jaa.e jī ko mere

sitam hai un ko ḳhamosh rahnā ġhazab hai sun kar sunā na karnā

ḳhushī hai un ko ye jāntā huuñ magar maiñ rakhne ko baat apnī

kahūñ ye un se ki ba.ad-e-murdan tum aa ke mātam mirā na karnā

vo jāneñ 'ishq-o-havas ko jab tak hayāt dushman kī hai ġhanīmat

baḌhegī us se hī qadr apnī ki ġhārat us ko ḳhudā na karnā

sabab maraz kā hai tark-e-ādat yahāñ yahāñ haiñ dard-o-alam kī ḳhūgar

yahī samajhnā davā hamārī ki chāra-sāzo davā na karnā

agar hai aanā to ab bhī aao na tañg aa kar vo kuchh kareñ ham

ki jis ko sun kar kahe zamāna kiyā vo us ne jo thā na karnā

ye ek muddat kī hai tavaqqo' miTā na denā ilāhī is ko

agar hai manzūr paas us kā zuhūr roz-e-jazā na karnā

hameñ to marnā hai āḳhir ik din tumhāre sar ho ke mar raheñge

satā.e jaanā tumheñ qasam hai kamī na karnā ḳhatā na karnā

batā rahe haiñ falak ko dushman vo muntaqim hai kare jo chāhe

uThe hue haiñ jo haath apne tasavvur us ko du'ā na karnā

kaheñ 'adū kī burā.iyāñ kyā mile ho us se milo va-lekin

batā.e dete haiñ is liye ham ki ham se aa kar gilā na karnā

laboñ pe rahnā ki jab tak ummīd-e-āmad us kī hai mujh ko baaqī

kare na va.ada vafā agar vo to mujh se ai jaañ vafā na karnā

yahīñ ho apnā sā haal dushman mile na dozaḳh balā se us ko

na nikle jab tak ye hasrat apnī ilāhī mahshar bapā na karnā

hayā kā parda hai varna tum to hue pashemān-e-jañg-e-dushman

nahīñ ho fikr musālahat meñ to ham se mil kar hayā na karnā

saheñge jo kuchh paḌegī ham par balā meñ phañste ho kis liye tum

agar hai manzūr ḳhair 'sālik' to zikr un se mirā na karnā

hazar wa'de kiye hain tum ne kabhi kisi ko wafa na karna

chalo usi par jo ghair kah den kahin hamara kaha na karna

agar na sunte ho baat meri to sabr aa jae ji ko mere

sitam hai un ko KHamosh rahna ghazab hai sun kar suna na karna

KHushi hai un ko ye jaanta hun magar main rakhne ko baat apni

kahun ye un se ki baad-e-murdan tum aa ke matam mera na karna

wo jaanen 'ishq-o-hawas ko jab tak hayat dushman ki hai ghanimat

baDhegi us se hi qadr apni ki ghaarat us ko KHuda na karna

sabab maraz ka hai tark-e-adat yahan yahan hain dard-o-alam ki KHugar

yahi samajhna dawa hamari ki chaara-sazo dawa na karna

agar hai aana to ab bhi aao na tang aa kar wo kuchh karen hum

ki jis ko sun kar kahe zamana kiya wo us ne jo tha na karna

ye ek muddat ki hai tawaqqo' miTa na dena ilahi is ko

agar hai manzur pas us ka zuhur roz-e-jaza na karna

hamein to marna hai aaKHir ek din tumhaare sar ho ke mar rahenge

satae jaana tumhein qasam hai kami na karna KHata na karna

bata rahe hain falak ko dushman wo muntaqim hai kare jo chahe

uThe hue hain jo hath apne tasawwur us ko du'a na karna

kahen 'adu ki buraiyan kya mile ho us se milo wa-lekin

batae dete hain is liye hum ki hum se aa kar gila na karna

labon pe rahna ki jab tak ummid-e-amad us ki hai mujh ko baqi

kare na wada wafa agar wo to mujh se ai jaan wafa na karna

yahin ho apna sa haal dushman mile na dozaKH bala se us ko

na nikle jab tak ye hasrat apni ilahi mahshar bapa na karna

haya ka parda hai warna tum to hue pasheman-e-jang-e-dushman

nahin ho fikr musalahat mein to hum se mil kar haya na karna

sahenge jo kuchh paDegi hum par bala mein phanste ho kis liye tum

agar hai manzur KHair 'salik' to zikr un se mera na karna