hazaron fasl-e-gul hon pankhuDi achchhi nahin lagti

hazāroñ fasl-e-gul hoñ pankhuḌī achchhī nahīñ lagtī

tire bin mujh ko sāvan kī jhaḌī achchhī nahīñ lagtī

agar tark-e-ta'alluq mujh se karnā hai to jaldī kar

makāñ meñ der tak mayyat paḌī achchhī nahīñ lagtī

mire hāthoñ meñ jab tak haath terā aa nahīñ jaatā

yaqīnan mujh ko sāñsoñ kī laḌī achchhī nahīñ lagtī

musalsal chalne vāloñ ko mileñgī manzileñ ik din

thakan mujh ko kisī rah par khaḌī achchhī nahīñ lagtī

hamesha vaqt se pahle sulā detī hai āñkhoñ ko

mujhe dīvār se lipTī ghaḌī achchhī nahīñ lagtī

asīrī zulf-e-jānāñ kī jinheñ 'dil' raas aa jaa.e

kisī sone kī un ko hathkaḌī achchhī nahīñ lagtī

hazaron fasl-e-gul hon pankhuDi achchhi nahin lagti

tere bin mujh ko sawan ki jhaDi achchhi nahin lagti

agar tark-e-ta'alluq mujh se karna hai to jaldi kar

makan mein der tak mayyat paDi achchhi nahin lagti

mere hathon mein jab tak hath tera aa nahin jata

yaqinan mujh ko sanson ki laDi achchhi nahin lagti

musalsal chalne walon ko milengi manzilen ek din

thakan mujh ko kisi rah par khaDi achchhi nahin lagti

hamesha waqt se pahle sula deti hai aankhon ko

mujhe diwar se lipTi ghaDi achchhi nahin lagti

asiri zulf-e-jaanan ki jinhen 'dil' ras aa jae

kisi sone ki un ko hathkaDi achchhi nahin lagti