hazaron gham hain lekin bar-e-gham dil par na rakkhunga

hazāroñ ġham haiñ lekin bār-e-ġham dil par na rakkhūñgā

ye nāzuk ābgīna us pe maiñ patthar na rakkhūñgā

vo mausam vo fazā vo sā.ateñ tere bichhaḌne kī

maiñ apne zehn meñ maazī ke pas-manzar na rakkhūñgā

koī maskan na hogā ab mirī be-ḳhvāb rātoñ kā

maiñ apne dushmanoñ ke biich apnā ghar na rakkhūñgā

chalūñgā saath apne kārvān-e-sarḳhushī le kar

jilau meñ ab ġham-e-andoh kā lashkar na rakkhūñgā

mirā kyā hai mujhe kāñToñ pe so lene kī 'ādat hai

masāf-e-zindagī meñ bālish-o-bistar na rakkhūñgā

bahut mohtāt rahne par bhī aksar bhiig jaatā hai

maiñ koshish laakh kartā huuñ ki dāman tar na rakkhūñgā

bajā hai ai 'hazīñ' mujrim huuñ nā-karda gunāhī kā

magar ilzām jiine kā maiñ apne sar na rakkhūñgā

hazaron gham hain lekin bar-e-gham dil par na rakkhunga

ye nazuk aabgina us pe main patthar na rakkhunga

wo mausam wo faza wo saaten tere bichhaDne ki

main apne zehn mein mazi ke pas-manzar na rakkhunga

koi maskan na hoga ab meri be-KHwab raaton ka

main apne dushmanon ke bich apna ghar na rakkhunga

chalunga sath apne karwan-e-sarKHushi le kar

jilau mein ab gham-e-andoh ka lashkar na rakkhunga

mera kya hai mujhe kanTon pe so lene ki 'adat hai

masaf-e-zindagi mein baalish-o-bistar na rakkhunga

bahut mohtat rahne par bhi aksar bhig jata hai

main koshish lakh karta hun ki daman tar na rakkhunga

baja hai ai 'hazin' mujrim hun na-karda gunahi ka

magar ilzam jine ka main apne sar na rakkhunga