hazaron raaz nihan hain dahan ke parde mein

hazāroñ raaz nihāñ haiñ dahan ke parde meñ

karoḌoñ nukte haiñ ik ik suḳhan ke parde meñ

nihāñ hai shāhid-e-matlab suḳhan ke parde meñ

zabān bol rahī hai dahan ke parde meñ

basā hai itr-e-mohabbat se jāma-e-hastī

chhupā hai kaun gul is pairahan ke parde meñ

nikāl laayā unheñ shauq ḳhud-numā.ī kā

vo aisī shaan se baiThe the ban ke parde meñ

ġhazab kā parda-nashīñ hai vo shoḳh harjā.ī

har anjuman meñ hai har anjuman ke parde meñ

khulā sabab hameñ lailā kī jāma-zebī kā

ki rūh-e-qais hai us pairahan ke parde meñ

daroñ pe jin ke the zarbaft ke paḌe parde

us us makāñ ke makīñ haiñ kafan ke parde meñ

jo dekhā ahl-e-basīrat ne donoñ ko to kahā

huzūr hī haiñ husain-o-hasan ke parde meñ

najāt ahl-e-gunāh ko kahīñ nahīñ 'akbar'

abas chhupā hai tū jā kar kafan ke parde meñ

hazaron raaz nihan hain dahan ke parde mein

karoDon nukte hain ek ek suKHan ke parde mein

nihan hai shahid-e-matlab suKHan ke parde mein

zaban bol rahi hai dahan ke parde mein

basa hai itr-e-mohabbat se jama-e-hasti

chhupa hai kaun gul is pairahan ke parde mein

nikal laya unhen shauq KHud-numai ka

wo aisi shan se baiThe the ban ke parde mein

ghazab ka parda-nashin hai wo shoKH harjai

har anjuman mein hai har anjuman ke parde mein

khula sabab hamein laila ki jama-zebi ka

ki ruh-e-qais hai us pairahan ke parde mein

daron pe jin ke the zarbaft ke paDe parde

us us makan ke makin hain kafan ke parde mein

jo dekha ahl-e-basirat ne donon ko to kaha

huzur hi hain husain-o-hasan ke parde mein

najat ahl-e-gunah ko kahin nahin 'akbar'

abas chhupa hai tu ja kar kafan ke parde mein