hijab aane laga ab to bala-e-asmani ko

hijāb aane lagā ab to balā-e-āsmānī ko

ḳhudā rakkhe salāmat tere nāz-e-bāġhbānī ko

muqayyad jo rakhe lafzoñ kī duniyā meñ ma.ānī ko

salām us sher-goī ko salām us sher-ḳhvānī ko

mohabbat kirdgār-e-ġham hai ġham taḳhlīq kartī hai

mohabbat karne vaale bhuul jaa.eñ shādmānī ko

shikāyat to mohabbat hī kā ik tab.ī natīja hai

mohabbat hī havā detī hai har ik bad-gumānī ko

hameñ zulfoñ ke saa.e meñ mayassar kis tarah hotī

ik aisī dhuup jo sargarm rakhtī naujavānī ko

ġham-e-duniyā to kyā 'ehsāñ' ġham-e-jānāñ ne kab baḳhshā

ik aisā dard jo bedār kar de zindagānī ko

garebāñ chaak hai 'ehsān' to fikr-e-rafū kyoñ hai

koī barbād kartā hai mohabbat kī nishānī ko

hijab aane laga ab to bala-e-asmani ko

KHuda rakkhe salamat tere naz-e-baghbani ko

muqayyad jo rakhe lafzon ki duniya mein maani ko

salam us sher-goi ko salam us sher-KHwani ko

mohabbat kirdgar-e-gham hai gham taKHliq karti hai

mohabbat karne wale bhul jaen shadmani ko

shikayat to mohabbat hi ka ek tabi natija hai

mohabbat hi hawa deti hai har ek bad-gumani ko

hamein zulfon ke sae mein mayassar kis tarah hoti

ek aisi dhup jo sargarm rakhti naujawani ko

gham-e-duniya to kya 'ehsan' gham-e-jaanan ne kab baKHsha

ek aisa dard jo bedar kar de zindagani ko

gareban chaak hai 'ehsan' to fikr-e-rafu kyon hai

koi barbaad karta hai mohabbat ki nishani ko