hijazi rang mein jo rang-e-irfan dekh lete hain

hijāzī rang meñ jo rang-e-irfāñ dekh lete haiñ

vo apne kufr meñ bhī nūr-e-īmāñ dekh lete haiñ

kabhī rahtā thā ġham pā-e-talab manzil ke dāman meñ

magar ab paañv ko manzil-ba-dāmāñ dekh lete haiñ

chhupe jā tū nazar se laakh dil se chhup nahīñ saktā

tirī tanvīr nazdīk-e-rag-e-jāñ dekh lete haiñ

bas itnī rah ga.ī hai ab qafas meñ surḳhī-e-gulshan

bahāreñ yaad aatī haiñ to dāmāñ dekh lete haiñ

junūn-e-shauq zindabād tū ne vo nigāheñ diiñ

ki ghar baiThe hue terā bayābāñ dekh lete haiñ

niyāz-e-ishq se yuuñ be-niyāz-e-ishq ban baiThe

ki apnī shakl meñ ab rū-e-jānāñ dekh lete haiñ

vo jazb-e-shauq ab sayyād hai terī ināyat se

qafas meñ qaid rakh kar bhī gulistāñ dekh lete haiñ

ye kis ne khol dī hai aañkh dil kī is tarah 'sarvar'

jahāñ palkeñ jhukeñ ham husn-e-jānāñ dekh lete haiñ

hijazi rang mein jo rang-e-irfan dekh lete hain

wo apne kufr mein bhi nur-e-iman dekh lete hain

kabhi rahta tha gham pa-e-talab manzil ke daman mein

magar ab panw ko manzil-ba-daman dekh lete hain

chhupe ja tu nazar se lakh dil se chhup nahin sakta

teri tanwir nazdik-e-rag-e-jaan dekh lete hain

bas itni rah gai hai ab qafas mein surKHi-e-gulshan

bahaaren yaad aati hain to daman dekh lete hain

junun-e-shauq zindabaad tu ne wo nigahen din

ki ghar baiThe hue tera bayaban dekh lete hain

niyaz-e-ishq se yun be-niyaz-e-ishq ban baiThe

ki apni shakl mein ab ru-e-jaanan dekh lete hain

wo jazb-e-shauq ab sayyaad hai teri inayat se

qafas mein qaid rakh kar bhi gulistan dekh lete hain

ye kis ne khol di hai aankh dil ki is tarah 'sarwar'

jahan palken jhuken hum husn-e-jaanan dekh lete hain