hijr inam-e-wafa ho jaise

hijr in.ām-e-vafā ho jaise

jurm-e-ulfat kī sazā ho jaise

dāġh-e-dil aaj bhī lau detā hai

terā naqsh-e-kaf-e-pā ho jaise

rahrav-e-rāh-e-vafā se pūchho

har-nafas karb-o-balā ho jaise

dil meñ ye josh-e-tarab to dekho

dard bhī koī davā ho jaise

yuuñ har ik ḳhat ko takā kartā huuñ

mere hī naam likhā ho jaise

ġhaur se ahl-e-qafas haañ sunñā

jaras-e-gul kī sadā ho jaise

ek taa.ir nazar aayā hai abhī

hudhud-e-shahr-e-sabā ho jaise

tesha-zan koī nihāñ thā mujh meñ

vo bhī ab mar sā gayā ho jaise

mere ash.ār vo yuuñ paḌhtā hai

aa.ina dekh rahā ho jaise

yuuñ havā chīḳh rahī hai ban meñ

dil use DhūñD rahā ho jaise

ye tirā 'jābir'-e-shīrīñ-guftār

ḳhusrav-e-shahr-e-navā ho jaise

hijr inam-e-wafa ho jaise

jurm-e-ulfat ki saza ho jaise

dagh-e-dil aaj bhi lau deta hai

tera naqsh-e-kaf-e-pa ho jaise

rahraw-e-rah-e-wafa se puchho

har-nafas karb-o-bala ho jaise

dil mein ye josh-e-tarab to dekho

dard bhi koi dawa ho jaise

yun har ek KHat ko taka karta hun

mere hi nam likha ho jaise

ghaur se ahl-e-qafas han sunna

jaras-e-gul ki sada ho jaise

ek tair nazar aaya hai abhi

hudhud-e-shahr-e-saba ho jaise

tesha-zan koi nihan tha mujh mein

wo bhi ab mar sa gaya ho jaise

mere ashaar wo yun paDhta hai

aaina dekh raha ho jaise

yun hawa chiKH rahi hai ban mein

dil use DhunD raha ho jaise

ye tera 'jabir'-e-shirin-guftar

KHusraw-e-shahr-e-nawa ho jaise