hijr ke mare kiwaDon se purane se ye KHwab

hijr ke maare kivāḌoñ se purāne se ye ḳhvāb

ashk ban kar nikal aate haiñ bahāne se ye ḳhvāb

raat bhar jāgtā rahtā hai isī soch meñ dil

chale jaa.eñ na kahīñ niiñd ke aane se ye ḳhvāb

pā.eñtī se ho lagā sar to sukūñ hai varna

uTh ke aa jaate haiñ āñkhoñ meñ sirhāne se ye ḳhvāb

is liye bhī to nahīñ niiñd meñ chaltā huuñ maiñ tez

ḳhaak ho jaa.eñ na phir ḳhaak uḌāne se ye ḳhvāb

yaad aate hī diye meñ bhaḌak uThtī hai vo lau

baaz aate hī nahīñ siina jalāne se ye ḳhvāb

bhuul kar bhī na kahīñ tazkira karnā un kā

ki dobāra nahīñ aate haiñ sunāne se ye ḳhvāb

jāgtā rahtā hai āñkhoñ meñ ga.ī shab kā malāl

aur chhupte hī nahīñ laakh chhupāne se ye ḳhvāb

nahīñ miltā hai agar aks to jhuñjhlā ke maiñ phir

khīñch laatā huuñ tire ā.ina-ḳhāne se ye ḳhvāb

hijr ke mare kiwaDon se purane se ye KHwab

ashk ban kar nikal aate hain bahane se ye KHwab

raat bhar jagta rahta hai isi soch mein dil

chale jaen na kahin nind ke aane se ye KHwab

paenti se ho laga sar to sukun hai warna

uTh ke aa jate hain aankhon mein sirhane se ye KHwab

is liye bhi to nahin nind mein chalta hun main tez

KHak ho jaen na phir KHak uDane se ye KHwab

yaad aate hi diye mein bhaDak uThti hai wo lau

baz aate hi nahin sina jalane se ye KHwab

bhul kar bhi na kahin tazkira karna un ka

ki dobara nahin aate hain sunane se ye KHwab

jagta rahta hai aankhon mein gai shab ka malal

aur chhupte hi nahin lakh chhupane se ye KHwab

nahin milta hai agar aks to jhunjhla ke main phir

khinch lata hun tere aaina-KHane se ye KHwab