hijr ki be-tabiyan thin hasraton ka josh tha

hijr kī be-tābiyāñ thiiñ hasratoñ kā josh thā

husn kā āġhosh phir bhī husn kā āġhosh thā

ham to jis mahfil meñ baiThe shaġhl-e-nāv-nosh thā

zindagī meñ maut bhī aa.egī kis ko hosh thā

zabt karte karte āḳhir phuuT niklī dil kī baat

hañs paḌā gulshan meñ jo bhī ġhuncha-e-ḳhāmosh thā

ehtirām-e-husn kahiye yā use rob-e-jamāl

un kā parde se nikalnā thā ki maiñ behosh thā

mujh se pūchho sarguzasht-e-mai-kada bāda-kasho

thā kabhī merā bhī aalam maiñ bhī bāda-nosh thā

laġhzisheñ merī musallam ibtidā-e-ishq meñ

aap ko bhī kuchh ḳhabar thī aap ko bhī hosh thā

ishq kā e.ajāz thā ye ishq kī tāsīr bhī

dil se jo naala nikaltā thā sukūn-e-gosh thā

koī kyā samjhā mirī dīvāngī ko kyā ḳhabar

aap kī nazroñ meñ thā itnā to mujh ko hosh thā

aaj tasbīh-o-musalllā le ke 'ārif' ban gayā

kal jo rūh-e-mai-kada thā rind-o-bāda-nosh thā

hijr ki be-tabiyan thin hasraton ka josh tha

husn ka aaghosh phir bhi husn ka aaghosh tha

hum to jis mahfil mein baiThe shaghl-e-naw-nosh tha

zindagi mein maut bhi aaegi kis ko hosh tha

zabt karte karte aaKHir phuT nikli dil ki baat

hans paDa gulshan mein jo bhi ghuncha-e-KHamosh tha

ehtiram-e-husn kahiye ya use rob-e-jamal

un ka parde se nikalna tha ki main behosh tha

mujh se puchho sarguzasht-e-mai-kada baada-kasho

tha kabhi mera bhi aalam main bhi baada-nosh tha

laghzishen meri musallam ibtida-e-ishq mein

aap ko bhi kuchh KHabar thi aap ko bhi hosh tha

ishq ka eajaz tha ye ishq ki tasir bhi

dil se jo nala nikalta tha sukun-e-gosh tha

koi kya samjha meri diwangi ko kya KHabar

aap ki nazron mein tha itna to mujh ko hosh tha

aaj tasbih-o-musallla le ke 'arif' ban gaya

kal jo ruh-e-mai-kada tha rind-o-baada-nosh tha