hijr ki rut hai tera rup magar samne hai

hijr kī rut hai tirā ruup magar sāmne hai

haañ vahī chehra vahī dīda-e-tar sāmne hai

ḳhuub hai shahr-e-amāñ terā yahāñ bhī ai jaañ

jis se ham bach ke chale the vo ḳhatar sāmne hai

ab nahīñ koī yahāñ hausla dene vaalā

phir vahī dasht vahī shām-e-safar sāmne hai

saath chaltī thiiñ abhī ek nagar kī chīḳheñ

ab koī dūsrā majrūh nagar sāmne hai

ab bhī hai duurī kā ehsās ki shal haiñ paañv

yuuñ to maiñ shahr meñ huuñ aap kā ghar sāmne hai

dhuup kī tez tapish aur safar hai dar-pesh

sā.ebāñ koī yahāñ hai na shajar sāmne hai

agle lamhe kā bhalā kis ko yaqīñ hai 'at.har'

zindagī kyā hai bas ik raqs-e-sharar sāmne hai

hijr ki rut hai tera rup magar samne hai

han wahi chehra wahi dida-e-tar samne hai

KHub hai shahr-e-aman tera yahan bhi ai jaan

jis se hum bach ke chale the wo KHatar samne hai

ab nahin koi yahan hausla dene wala

phir wahi dasht wahi sham-e-safar samne hai

sath chalti thin abhi ek nagar ki chiKHen

ab koi dusra majruh nagar samne hai

ab bhi hai duri ka ehsas ki shal hain panw

yun to main shahr mein hun aap ka ghar samne hai

dhup ki tez tapish aur safar hai dar-pesh

saeban koi yahan hai na shajar samne hai

agle lamhe ka bhala kis ko yaqin hai 'athar'

zindagi kya hai bas ek raqs-e-sharar samne hai