hijr mein aise tere sham-o-sahar jate hain

hijr meñ aise tire shām-o-sahar jaate haiñ

qāfile yādoñ ke aate haiñ guzar jaate haiñ

kyā sazā paa.ī hai phūloñ ne mahakne kī ye

har sahar khilte haiñ har shaam bikhar jaate haiñ

dar-ba-dar ḳhvāb se manzar haiñ mirī āñkhoñ meñ

ġham bhī palkoñ pe mirī aa ke Thahar jaate haiñ

zindagī ham ne tirā kuchh to bharam rakkhā hai

itne kirdāroñ meñ jiite haiñ ki mar jaate haiñ

kū-ba-kū yaas kā 'ālam hai faqat ham tanhā

hausle TuuT ke rāhoñ meñ bikhar jaate haiñ

justujū kis kī hai jāneñ ye safar hai kaisā

ham ko jaanā hai kahāñ ham ye kidhar jaate haiñ

kashmakash meñ hai ḳhushī sab kī bhalā kyoñ āḳhir

ham jidhar jaate haiñ ye ġham bhī udhar jaate haiñ

aao ab yaaro zamīñ par bhī utar aa.eñ ham

ye parinde bhī bulandī se utar jaate haiñ

ik nazar terī zamāne pe huā kartī hai

igḌe-bigḌe jo muqaddar haiñ sañvar jaate haiñ

sar-phirī aag hai is dil meñ lagī ai 'ābid'

aa chaleñ ab kisī dariyā meñ utar jaate haiñ

hijr mein aise tere sham-o-sahar jate hain

qafile yaadon ke aate hain guzar jate hain

kya saza pai hai phulon ne mahakne ki ye

har sahar khilte hain har sham bikhar jate hain

dar-ba-dar KHwab se manzar hain meri aankhon mein

gham bhi palkon pe meri aa ke Thahar jate hain

zindagi hum ne tera kuchh to bharam rakkha hai

itne kirdaron mein jite hain ki mar jate hain

ku-ba-ku yas ka 'alam hai faqat hum tanha

hausle TuT ke rahon mein bikhar jate hain

justuju kis ki hai jaanen ye safar hai kaisa

hum ko jaana hai kahan hum ye kidhar jate hain

kashmakash mein hai KHushi sab ki bhala kyon aaKHir

hum jidhar jate hain ye gham bhi udhar jate hain

aao ab yaro zamin par bhi utar aaen hum

ye parinde bhi bulandi se utar jate hain

ek nazar teri zamane pe hua karti hai

igDe-bigDe jo muqaddar hain sanwar jate hain

sar-phiri aag hai is dil mein lagi ai 'abid'

aa chalen ab kisi dariya mein utar jate hain