hijr-saat ki dastan hain hum

hijr-sā.at kī dāstāñ haiñ ham

vo zamīñ hai to āsmāñ haiñ ham

aa parakh le hameñ tū ai duniyā

aaj hāsil haiñ kal kahāñ haiñ ham

dard-qisse haiñ apnī ġhazloñ meñ

log samjhe haiñ naġhma-ḳhvāñ haiñ ham

tere naqshe meñ rang kyā bharte

ab to ḳhud se bhī bad-gumāñ haiñ ham

aaj sāhil pe dhajjiyāñ bolīñ

kal kī kashtī ke bādbāñ haiñ ham

aag mausam hai apnī āñkhoñ meñ

barf vaadī ke hukmrāñ haiñ ham

apnī ḳhushbū hameñ nahīñ miltī

vaise kahne ko gulsitāñ haiñ ham

ham ne paanī hai nudrat-e-ehsās

mīr-o-ġhālib ke darmiyāñ haiñ ham

ghar basā kar bhī ġham-zada hai vo

ghar luTā kar bhī shādmāñ haiñ ham

hijr-saat ki dastan hain hum

wo zamin hai to aasman hain hum

aa parakh le hamein tu ai duniya

aaj hasil hain kal kahan hain hum

dard-qisse hain apni ghazlon mein

log samjhe hain naghma-KHwan hain hum

tere naqshe mein rang kya bharte

ab to KHud se bhi bad-guman hain hum

aaj sahil pe dhajjiyan bolin

kal ki kashti ke baadban hain hum

aag mausam hai apni aankhon mein

barf wadi ke hukmran hain hum

apni KHushbu hamein nahin milti

waise kahne ko gulsitan hain hum

hum ne pani hai nudrat-e-ehsas

mir-o-ghaalib ke darmiyan hain hum

ghar basa kar bhi gham-zada hai wo

ghar luTa kar bhi shadman hain hum