hijr se marhala-e-zist adam hai hum ko

hijr se marhala-e-zīst adam hai ham ko

fāsla itnā ziyāda hai ki kam hai ham ko

saa.e se uTh ke abhī dhuup meñ jā baiTheñge

ghar se sahrā to faqat ek qadam hai ham ko

pā-ba-jaulāñ tire kūche meñ bhī khīñche laa.e

shahna-e-shahr se ummīd-e-karam hai ham ko

qaht-e-māmūra-e-sūrat se haiñ patthar āñkheñ

ab ḳhudā bhī nazar aa.e to sanam hai ham ko

dekh kyā aa.ina be-jumbish-e-lab kahtā hai

jo ḳhamoshī se ho vo baat aham hai ham ko

be-yaqīnī ko yaqīñ hai ki huā kuchh bhī nahīñ

aur ik hādisa āñkhoñ kā bharam hai ham ko

ham kahāñ aur kahāñ kūcha-e-'ġhālib' 'āsim'

jāda-e-rah kashish-e-kāf-e-karam hai ham ko

hijr se marhala-e-zist adam hai hum ko

fasla itna ziyaada hai ki kam hai hum ko

sae se uTh ke abhi dhup mein ja baiThenge

ghar se sahra to faqat ek qadam hai hum ko

pa-ba-jaulan tere kuche mein bhi khinche lae

shahna-e-shahr se ummid-e-karam hai hum ko

qaht-e-mamura-e-surat se hain patthar aankhen

ab KHuda bhi nazar aae to sanam hai hum ko

dekh kya aaina be-jumbish-e-lab kahta hai

jo KHamoshi se ho wo baat aham hai hum ko

be-yaqini ko yaqin hai ki hua kuchh bhi nahin

aur ek hadisa aankhon ka bharam hai hum ko

hum kahan aur kahan kucha-e-'ghaalib' 'asim'

jada-e-rah kashish-e-kaf-e-karam hai hum ko