hijr us ka mere aasab pe yun tari tha

hijr us kā mire ā'sāb pe yuuñ taarī thā

baa'd marne ke bhī āñkhoñ se lahū jaarī thā

itnī jaldī saf-e-mātam se nikal aa.e ho

yaar tum ko to bahut zo'm-e-‘azā-dārī thā

kyā batā.ūñ tujhe furqat ke dinoñ kī hālat

mujh pe har roz qayāmat kī tarah bhārī thā

ham ba-zid the ki hameñ vasl kī sarshārī mile

vo magar vā'da vafā karne se inkārī thā

maiñ ne us vaqt bhī tujh ko tah-e-dil se chāhā

shaġhl jis daur meñ logoñ kā riyā-kārī thā

kis liye tere taġhāful se badal jaatā maiñ

mas.ala merā mohabbat meñ vafādārī thā

'aql meñ bhī na mirī sūd-o-ziyāñ aate the

dil to kartā hī mohabbat kī taraf-dārī thā

ghar bhī kab thā mire ārām-o-sukūñ kā bā'is

dasht bhī mere liye qarya-e-bezārī thā

vaqt paḌne pe mujhe sab kī samajh aatī thī

kis qadar faiz-rasāñ lamha-e-dushvārī thā

TūTne par bhī kahāñ mere nishāñ milte the

koī is Dhang se kartā mirī mismārī thā

use maarā gayā maslak kī binā par 'azvar'

jis kā paiġhām zamāne meñ ravādārī thā

hijr us ka mere aa'sab pe yun tari tha

ba'd marne ke bhi aankhon se lahu jari tha

itni jaldi saf-e-matam se nikal aae ho

yar tum ko to bahut zo'm-e-‘aza-dari tha

kya bataun tujhe furqat ke dinon ki haalat

mujh pe har roz qayamat ki tarah bhaari tha

hum ba-zid the ki hamein wasl ki sarshaari mile

wo magar wa'da wafa karne se inkari tha

main ne us waqt bhi tujh ko tah-e-dil se chaha

shaghl jis daur mein logon ka riya-kari tha

kis liye tere taghaful se badal jata main

masala mera mohabbat mein wafadari tha

'aql mein bhi na meri sud-o-ziyan aate the

dil to karta hi mohabbat ki taraf-dari tha

ghar bhi kab tha mere aaram-o-sukun ka ba'is

dasht bhi mere liye qarya-e-bezari tha

waqt paDne pe mujhe sab ki samajh aati thi

kis qadar faiz-rasan lamha-e-dushwari tha

TuTne par bhi kahan mere nishan milte the

koi is Dhang se karta meri mismari tha

use mara gaya maslak ki bina par 'azwar'

jis ka paigham zamane mein rawadari tha