himaqat yun hui mere junun ki pir mein tum the

himāqat yuuñ huī mere junūñ kī piir meñ tum the

taḳhayyul meñ thā koī aur par tahrīr meñ tum the

tumheñ gustāḳh maiñ kaise nazar aaya batāo to

mirī har vādī-e-dil-sozī kī tauqīr meñ tum the

hasīnāoñ ne mujh par tiir chhoḌe umr-bhar kyā kyā

kiyā jo ġhaur to har ik nazar ke tiir meñ tum the

shutter to camere kā chāñd par maiñ ne dabāyā thā

magar jab jā.eza maiñ ne liyā tasvīr meñ tum the

sabhī be-rang the manzar hasīñ chehre hasīñ vaadī

sunā ye baad meñ ki un dinoñ kashmīr meñ tum the

ḳhatā is meñ nahīñ merī ḳhudā kā faisla samjho

duāoñ meñ thā koī aur par taqdīr meñ tum the

kisī bhī qism kā unvān ho kuchh bhī taḳhayyul ho

magar 'az.har' ke har ik sher kī ta.amīr meñ tum the

himaqat yun hui mere junun ki pir mein tum the

taKHayyul mein tha koi aur par tahrir mein tum the

tumhein gustaKH main kaise nazar aaya batao to

meri har wadi-e-dil-sozi ki tauqir mein tum the

hasinaon ne mujh par tir chhoDe umr-bhar kya kya

kiya jo ghaur to har ek nazar ke tir mein tum the

shutter to camere ka chand par main ne dabaya tha

magar jab jaeza main ne liya taswir mein tum the

sabhi be-rang the manzar hasin chehre hasin wadi

suna ye baad mein ki un dinon kashmir mein tum the

KHata is mein nahin meri KHuda ka faisla samjho

duaon mein tha koi aur par taqdir mein tum the

kisi bhi qism ka unwan ho kuchh bhi taKHayyul ho

magar 'azhar' ke har ek sher ki tamir mein tum the