hiras hai ye azal ka ki zindagi kya hai

hirās hai ye azal kā ki zindagī kyā hai

ḳhudā nahīñ hai to logo umiid bhī kyā hai

kisī kā ras koī parvāz-e-rañg kī manzil

azār-e-lāla-e-sahrā kī tāzgī kyā hai

jo hai vo kuchh bhī nahīñ jo nahīñ vo sab kuchh hai

mire ḳhudā ye tamannā kī sāhirī kyā hai

tamām husn-e-jahāñ nā-tamām hai ki nahīñ

ye apsarā kā tasavvur ye jal-parī kyā hai

sab apnī samt ishāra kareñ agar pūchho

ki haq kidhar hai zamāne meñ rāstī kyā hai

diloñ ne umr bhar āvāz dī hai sīnoñ se

kisī ne jhūToñ bhī pūchhā nahīñ kabhī kyā hai

ye gher gher ke kyuuñ hāl-e-dil sunāte ho

yahāñ kisī ko kisī kī miyāñ paḌī kyā hai

batāo kaun se dānish-kade meñ paḌhne jaa.eñ

kahāñ nisāb meñ ye hai ki aadmī kyā hai

kabhī kabhī kī tursh-rūī-e-jamāl kī aan

ye añgbīñ meñ bhī thoḌī sī chāshnī kyā hai

diyā to ḳhud mirī ham-ḳhvāb ne bujhāyā thā

to phir ye sej pe tāroñ kī chhāñv sī kyā hai

tire uchaTte ishāre pe vaar duuñ jānāñ

hazār zindagiyāñ ek zindagī kyā hai

hiras hai ye azal ka ki zindagi kya hai

KHuda nahin hai to logo umid bhi kya hai

kisi ka ras koi parwaz-e-rang ki manzil

azar-e-lala-e-sahra ki tazgi kya hai

jo hai wo kuchh bhi nahin jo nahin wo sab kuchh hai

mere KHuda ye tamanna ki sahiri kya hai

tamam husn-e-jahan na-tamam hai ki nahin

ye apsara ka tasawwur ye jal-pari kya hai

sab apni samt ishaara karen agar puchho

ki haq kidhar hai zamane mein rasti kya hai

dilon ne umr bhar aawaz di hai sinon se

kisi ne jhuTon bhi puchha nahin kabhi kya hai

ye gher gher ke kyun haal-e-dil sunate ho

yahan kisi ko kisi ki miyan paDi kya hai

batao kaun se danish-kade mein paDhne jaen

kahan nisab mein ye hai ki aadmi kya hai

kabhi kabhi ki tursh-rui-e-jamal ki aan

ye angbin mein bhi thoDi si chashni kya hai

diya to KHud meri ham-KHwab ne bujhaya tha

to phir ye sej pe taron ki chhanw si kya hai

tere uchaTte ishaare pe war dun jaanan

hazar zindagiyan ek zindagi kya hai