hirs-e-duniya jo teri aankh ka tara hua hai

hirs-e-duniyā jo tirī aañkh kā taarā huā hai

ye kisī kā na hamārā na tumhārā huā hai

silvaTeñ yuuñ hī nahīñ ḳhāk-e-badan par haiñ mire

vaqt ke haath ne paikar ye sañvārā huā hai

mas.ala sirf mirī zaat se vābasta nahīñ

dahr meñ har koī taqdīr kā maarā huā hai

raqs kartā hai junūñ shauq-e-farāvānī par

jab se ye 'ishq mirī jaan dobārā huā hai

kaañp uTThī hai sar-e-shām charāġhoñ kī lau

haañ kisī ne to mirā naam pukārā huā hai

us ne toḌā hai ubalte hue dariyā kā ġhurūr

nāḳhudā jo abhī mañjdhār se haarā huā hai

yuuñ hī hoñToñ pe nahīñ ubhre tabassum ke nuqūsh

bazm meñ to kisī jānib se ishāra huā hai

yuuñ hī siine se lagātā nahīñ koī bhī 'ayāz'

ḳhaak chhānī hai to ye dasht hamārā huā hai

hirs-e-duniya jo teri aankh ka tara hua hai

ye kisi ka na hamara na tumhaara hua hai

silwaTen yun hi nahin KHak-e-badan par hain mere

waqt ke hath ne paikar ye sanwara hua hai

masala sirf meri zat se wabasta nahin

dahr mein har koi taqdir ka mara hua hai

raqs karta hai junun shauq-e-farawani par

jab se ye 'ishq meri jaan dobara hua hai

kanp uTThi hai sar-e-sham charaghon ki lau

han kisi ne to mera nam pukara hua hai

us ne toDa hai ubalte hue dariya ka ghurur

naKHuda jo abhi manjdhaar se haara hua hai

yun hi honTon pe nahin ubhre tabassum ke nuqush

bazm mein to kisi jaanib se ishaara hua hai

yun hi sine se lagata nahin koi bhi 'ayaz'

KHak chhani hai to ye dasht hamara hua hai