hisar-e-dil se udhar bhi haqiqaten hain bahut

hisār-e-dil se udhar bhī haqīqateñ haiñ bahut

tire baġhair bhī jiine kī sūrateñ haiñ haiñ

tire ġhurūr ko ham se shikāyateñ haiñ bajā

ham aadmī haiñ hameñ past ādateñ haiñ bahut

jo terī tarz-e-jafā se hamārā haal huā

zabāñ pe laa.eñ ye us meñ qabāhateñ haiñ bahut

agar hai bā.is-e-vahshat tujhe hamārā junūñ

hameñ bhī terī adā se shikāyateñ haiñ bahut

ġhalat ki milne meñ hai fāsle kā ḳhauf tujhe

ki āj-kal to safar meñ sahūlateñ haiñ bahut

mujhe to chhoḌ gayā raah meñ to Thiik huā

ki pā-shikasta thā maiñ aur masāfateñ haiñ bahut

zabān khol ke is bazm meñ ḳharāb hue

savāl ek thā lekin vazāhateñ haiñ bahut

kise suneñ to kareñ kis se ham gurez ki yaañ

har ik zabāñ pe ġhamoñ kī hikāyateñ haiñ bahut

hameñ azāb-e-qayāmat kā koī ḳhauf nahīñ

ki is se baḌh ke jahāñ meñ qayāmateñ haiñ bahut

mile ye log to kyuuñ aur log kyuuñ na mile

javāb koī nahīñ hai bujhārteñ haiñ bahut

nahīñ hai aaj kī tanhā.iyoñ se haul hameñ

ki dil pe naqsh javānī kī sūrateñ haiñ bahut

kis ehtiyāt se ai 'arsh' us ko sarf kareñ

matā-e-umr hai kam aur chāhateñ haiñ bahut

hisar-e-dil se udhar bhi haqiqaten hain bahut

tere baghair bhi jine ki suraten hain hain

tere ghurur ko hum se shikayaten hain baja

hum aadmi hain hamein past aadaten hain bahut

jo teri tarz-e-jafa se hamara haal hua

zaban pe laen ye us mein qabahaten hain bahut

agar hai bais-e-wahshat tujhe hamara junun

hamein bhi teri ada se shikayaten hain bahut

ghalat ki milne mein hai fasle ka KHauf tujhe

ki aaj-kal to safar mein sahulaten hain bahut

mujhe to chhoD gaya rah mein to Thik hua

ki pa-shikasta tha main aur masafaten hain bahut

zaban khol ke is bazm mein KHarab hue

sawal ek tha lekin wazahaten hain bahut

kise sunen to karen kis se hum gurez ki yan

har ek zaban pe ghamon ki hikayaten hain bahut

hamein azab-e-qayamat ka koi KHauf nahin

ki is se baDh ke jahan mein qayamaten hain bahut

mile ye log to kyun aur log kyun na mile

jawab koi nahin hai bujhaarten hain bahut

nahin hai aaj ki tanhaiyon se haul hamein

ki dil pe naqsh jawani ki suraten hain bahut

kis ehtiyat se ai 'arsh' us ko sarf karen

mata-e-umr hai kam aur chahaten hain bahut