hisar-e-gard mein tanha khaDa hun

hisār-e-gard meñ tanhā khaḌā huuñ

maiñ apnī ḳhvāhishoñ kā silsila huuñ

ḳhalā kī vus.atoñ ko nāptā huuñ

ġhubār-e-rahguzar uḌtā huā huuñ

vo itnā paas hai mere ki us ko

maiñ āñkheñ band karke dekhtā huuñ

hazāroñ miil kā lambā safar hai

maiñ lamhoñ meñ jise tai kar rahā huuñ

yaqīñ aa.e na aa.e tum ko lekin

maiñ apnī khoj meñ ghar se chalā huuñ

mire baare meñ vo bhī sochtā hai

ḳhudā kā shukr maiñ bhī jī rahā huuñ

ye kis kī yaad ne kī zau-fishānī

safar meñ jugnuoñ ko dekhtā huuñ

koī shādāb mausam aa.e mujh tak

maiñ sūkhā peḌ raste par khaḌā huuñ

mahakte phuul kī ḳhvāhish meñ 'ḳhālid'

maiñ tanhā.ī kā mausam jheltā huuñ

hisar-e-gard mein tanha khaDa hun

main apni KHwahishon ka silsila hun

KHala ki wusaton ko napta hun

ghubar-e-rahguzar uDta hua hun

wo itna pas hai mere ki us ko

main aankhen band karke dekhta hun

hazaron mil ka lamba safar hai

main lamhon mein jise tai kar raha hun

yaqin aae na aae tum ko lekin

main apni khoj mein ghar se chala hun

mere bare mein wo bhi sochta hai

KHuda ka shukr main bhi ji raha hun

ye kis ki yaad ne ki zau-fishani

safar mein jugnuon ko dekhta hun

koi shadab mausam aae mujh tak

main sukha peD raste par khaDa hun

mahakte phul ki KHwahish mein 'KHalid'

main tanhai ka mausam jhelta hun