hisar-e-hifz-e-jaan koi nahin hai

hisār-e-hifz-e-jāñ koī nahīñ hai

hai kashtī bādbāñ koī nahīñ hai

jahāñ tak maiñ gayā rāh-e-talab meñ

vahāñ tak sā.ebāñ koī nahīñ hai

kuchh aisī zehniyat ke log bhī haiñ

jahāñ vo haiñ vahāñ koī nahīñ hai

mohabbat meñ hai nafrat kā bhī imkāñ

ḳhulūs-e-be-karāñ koī nahīñ hai

gumāñ ho apne vīrāne kā jis par

makāñ aisā yahāñ koī nahīñ hai

ḳhud apne aap se ham bad-gumāñ haiñ

kisī se bad-gumāñ koī nahīñ hai

huī tasdīq un se guftugū par

javāb-e-jāhilāñ koī nahīñ hai

talab kī āḳhirī manzil hai shāhid

ġham-e-sūd-o-ziyāñ koī nahīñ hai

hisar-e-hifz-e-jaan koi nahin hai

hai kashti baadban koi nahin hai

jahan tak main gaya rah-e-talab mein

wahan tak saeban koi nahin hai

kuchh aisi zehniyat ke log bhi hain

jahan wo hain wahan koi nahin hai

mohabbat mein hai nafrat ka bhi imkan

KHulus-e-be-karan koi nahin hai

guman ho apne virane ka jis par

makan aisa yahan koi nahin hai

KHud apne aap se hum bad-guman hain

kisi se bad-guman koi nahin hai

hui tasdiq un se guftugu par

jawab-e-jahilan koi nahin hai

talab ki aaKHiri manzil hai shahid

gham-e-sud-o-ziyan koi nahin hai