hisar-e-hosh mein KHwabon ke dar rakkhe gae hain

hisār-e-hosh meñ ḳhvāboñ ke dar rakkhe ga.e haiñ

koī rasta nahīñ hai aur safar rakkhe ga.e haiñ

guhar aatā hai āġhosh-e-sadaf meñ buuñd ban kar

zamīn-o-āsmāñ meñ nāma-bar rakkhe ga.e haiñ

basantī dhuup āñgan meñ simaT kar so rahī hai

havā ke dosh par peḌoñ ke sar rakkhe ga.e haiñ

azal se bhāgtā huuñ apne hī saa.e ke pīchhe

ta.āqub meñ mire shām-o-sahar rakkhe ga.e haiñ

ye kaisā khel hai dushvār jiine ke jatan haiñ

magar marne ke gur āsān-tar rakkhe ga.e haiñ

adā hoñge hamārī be-bahā lā-hāsilī meñ

vo saare qarz jo is jaan par rakkhe ga.e haiñ

chaḌhā hai din nikal aa.e haiñ bāzāroñ meñ saa.e

magar jo jism the saare vo ghar rakkhe ga.e haiñ

chunā hai reza reza ham ne apnī ḳhvāhishoñ ko

ye TuuTe aa.ine the joḌ kar rakkhe ga.e haiñ

likhegā kaun yārab lazzat-e-be-iḳhtiyār apnī

saroñ par kātbīn-e-ḳhair-o-shar rakkhe ga.e haiñ

hai ta.avīz suḳhan kā mo.ajiza 'sarmad' ki ham par

tilism-e-jāh-o-mansab be-asar rakkhe ga.e haiñ

hisar-e-hosh mein KHwabon ke dar rakkhe gae hain

koi rasta nahin hai aur safar rakkhe gae hain

guhar aata hai aaghosh-e-sadaf mein bund ban kar

zamin-o-asman mein nama-bar rakkhe gae hain

basanti dhup aangan mein simaT kar so rahi hai

hawa ke dosh par peDon ke sar rakkhe gae hain

azal se bhagta hun apne hi sae ke pichhe

taaqub mein mere sham-o-sahar rakkhe gae hain

ye kaisa khel hai dushwar jine ke jatan hain

magar marne ke gur aasan-tar rakkhe gae hain

ada honge hamari be-baha la-hasili mein

wo sare qarz jo is jaan par rakkhe gae hain

chaDha hai din nikal aae hain bazaron mein sae

magar jo jism the sare wo ghar rakkhe gae hain

chuna hai reza reza hum ne apni KHwahishon ko

ye TuTe aaine the joD kar rakkhe gae hain

likhega kaun yarab lazzat-e-be-iKHtiyar apni

saron par katbin-e-KHair-o-shar rakkhe gae hain

hai tawiz suKHan ka moajiza 'sarmad' ki hum par

tilism-e-jah-o-mansab be-asar rakkhe gae hain