hisar-e-zat bhi zulmat-kada lage hai mujhe

hisār-e-zāt bhī zulmat-kada lage hai mujhe

bujhā-bujhā sā charāġh-e-vafā lage hai mujhe

andherī raat meñ le de ke ik sitāra thā

so ye sitāra bhī ab Dūbtā lage hai mujhe

ab aur kis ko banā.ūñ anīs-e-tanhā.ī

tirā ḳhayāl bhī rūThā huā lage hai mujhe

qarīb aur qarīb aa mire gale lag jā

ki tū bhī vaqt kā maarā huā lage hai mujhe

nigāh-e-lutf se kyā us ne mujh ko dekh liyā

mirā vajūd bhī ab jaane kyā lage hai mujhe

ḳhudā to ek hai lekin bharī ḳhudā.ī meñ

nigāh jis pe paḌe hai ḳhudā lage hai mujhe

tire junūñ se mujhe faiz ye huā hāsil

duā lage hai na ab badduā lage hai mujhe

na jaane 'fauq' ko kyoñ log rind kahte haiñ

ye aadmī to baḌā pārsā lage hai mujhe

hisar-e-zat bhi zulmat-kada lage hai mujhe

bujha-bujha sa charagh-e-wafa lage hai mujhe

andheri raat mein le de ke ek sitara tha

so ye sitara bhi ab Dubta lage hai mujhe

ab aur kis ko banaun anis-e-tanhai

tera KHayal bhi ruTha hua lage hai mujhe

qarib aur qarib aa mere gale lag ja

ki tu bhi waqt ka mara hua lage hai mujhe

nigah-e-lutf se kya us ne mujh ko dekh liya

mera wajud bhi ab jaane kya lage hai mujhe

KHuda to ek hai lekin bhari KHudai mein

nigah jis pe paDe hai KHuda lage hai mujhe

tere junun se mujhe faiz ye hua hasil

dua lage hai na ab baddua lage hai mujhe

na jaane 'fauq' ko kyon log rind kahte hain

ye aadmi to baDa parsa lage hai mujhe