hisar-e-zat se nikal ke be-kanar hum hue

hisār-e-zāt se nikal ke be-kanār ham hue

zamīn-o-āsmāñ kā nuqra.ī ġhubār ham hue

rahī na garmī-e-vafā diloñ meñ ab haiñ dūriyāñ

sunā ke hāl-e-dil tumheñ jahāñ meñ ḳhvār ham hue

pas-e-ġhubār-e-ā.ina ik aks tum pe baar thā

bas ek zarb tum ne dī to be-shumār ham hue

milī jo āgahī hameñ ridā-e-nūr meñ Dhale

falak kī kahkashāoñ ke bhī tājdār ham hue

muḳhālifat kī āñdhiyāñ qadam na Dagmagā sakīñ

ufuq se misl-e-āftāb āshkār ham hue

mohabbateñ mahak uThīñ ḳhafī thā jo ayaañ huā

milī haiñ shohrateñ unheñ jo ishtihār ham hue

ajab sī ulfateñ rahīñ ajiib fāsle rahe

na qurbateñ baham rahīñ na rad hī yaar ham hue

hisar-e-zat se nikal ke be-kanar hum hue

zamin-o-asman ka nuqrai ghubar hum hue

rahi na garmi-e-wafa dilon mein ab hain duriyan

suna ke haal-e-dil tumhein jahan mein KHwar hum hue

pas-e-ghubar-e-aina ek aks tum pe bar tha

bas ek zarb tum ne di to be-shumar hum hue

mili jo aagahi hamein rida-e-nur mein Dhale

falak ki kahkashaon ke bhi tajdar hum hue

muKHalifat ki aandhiyan qadam na Dagmaga sakin

ufuq se misl-e-aftab aashkar hum hue

mohabbaten mahak uThin KHafi tha jo ayan hua

mili hain shohraten unhen jo ishtihaar hum hue

ajab si ulfaten rahin ajib fasle rahe

na qurbaten baham rahin na rad hi yar hum hue