hisar mein liye be-nam ek wahshat thi

hisār meñ liye be-nām ek vahshat thī

yahī matā' yahī zindagī kī qīmat thī

kahīñ qiyām bhī karte to bad-gumāñ rahte

hamāre pair se lipTī huī vo hijrat thī

tirī talāsh faqat zād-e-rāh thī ham ko

vagarna ham ko faqat apnī hī zarūrat thī

tamām 'umr vafādār hī rahe apne

barā.e zaḳhm tire haath pe bhī bai'at thī

mileñ to pursish-e-ahvāl bhī zarūrī thā

ye guftugū bhī koī sūrat-e-mohabbat thī

thakan hī de ke gayā zaat kā safar mujh ko

ki ye bhī rā.egāñ shāyad koī masāfat thī

zamīñ pe bojh se apne girī thiiñ dīvāreñ

ye aur baat ki barsāt se shikāyat thī

havā kī zad pe hī aa kar charāġh bujhnā thā

vagarna phir to rivāyāt se baġhāvat thī

hisar mein liye be-nam ek wahshat thi

yahi mata' yahi zindagi ki qimat thi

kahin qiyam bhi karte to bad-guman rahte

hamare pair se lipTi hui wo hijrat thi

teri talash faqat zad-e-rah thi hum ko

wagarna hum ko faqat apni hi zarurat thi

tamam 'umr wafadar hi rahe apne

barae zaKHm tere hath pe bhi bai'at thi

milen to pursish-e-ahwal bhi zaruri tha

ye guftugu bhi koi surat-e-mohabbat thi

thakan hi de ke gaya zat ka safar mujh ko

ki ye bhi raegan shayad koi masafat thi

zamin pe bojh se apne giri thin diwaren

ye aur baat ki barsat se shikayat thi

hawa ki zad pe hi aa kar charagh bujhna tha

wagarna phir to riwayat se baghawat thi